కల్యాణం.. రమణీయం

కల్యాణమూర్తులు శ్రీదేవి, భూదేవి సమేత శ్రీనివాసుడు

ద్వారకాతిరుమల, న్యూస్‌టుడే: ద్వారకాతిరుమల శ్రీవారి ఉపాలయం లక్ష్మీపురం వేంకటేశ్వరస్వామి కల్యాణోత్సవం శుక్రవారం రాత్రి కనుల పండువగా నిర్వహించారు. తొలుత ఆలయ ప్రాంగణంలో ఉన్న మండపంలో స్వామి, అమ్మవార్లను కొలువుదీర్చి అలంకరించారు. అనంతరం అర్చకులు, పండితులు హారతిచ్చి కల్యాణ క్రతువు ప్రారంభించారు. ముహూర్త సమయంలో జీలకర్రబెల్లం, మాంగల్యధారణ, తలంబ్రాలు వంటి కార్యక్రమాలను శాస్త్రోక్తంగా జరిపించారు. భక్తులు పాల్గొని దర్శించుకున్నారు. 

శ్రీవారి సేవా టికెట్ల రుసుముల పెంపు

ద్వారకాతిరుమల, న్యూస్‌టుడే: ద్వారకాతిరుమల శ్రీవారి సేవా టికెట్ల రుసుములను పెంచినట్లు ఆలయ ఈవో వేండ్ర త్రినాథరావు తెలిపారు. సుప్రభాత సేవా టికెట్‌ రుసుము రూ.200 నుంచి రూ.300, అష్టోత్తరం శతనామార్చన రూ.300 నుంచి రూ.500, దీపారాధన సేవ రూ.10 నుంచి రూ.20లకు పెంచినట్లు పేర్కొన్నారు. ఈ నెల 10 నుంచి పెంచిన ధరలు అమల్లోకి వస్తాయని వెల్లడించారు.