దిల్లీ: లోక్‌సభ ఎన్నికల్లో గెలుపే లక్ష్యంగా రాజకీయ పార్టీలు ప్రచారాన్ని హోరెత్తిస్తున్నాయి. ఓటర్లను తమవైపు ఆకర్షించి ప్రత్యర్థుల్ని చిత్తు చేసేలా వివిధ రకాల ప్రచార అస్త్రాలను ఎంచుకొంటున్నాయి. ఈ నేపథ్యంలోనే ముస్లిం రిజర్వేషన్ల అంశంపై కర్ణాటక భాజపా షేర్‌ చేసిన ఓ వీడియో వివాదాస్పదమైంది. దీనిపై వచ్చిన ఫిర్యాదుల ఆధారంగా పోలీసులు ఎఫ్‌ఐఆర్‌ నమోదు చేయగా.. ఎన్నికల సంఘం అధికారులు సైతం స్పందించారు. ముస్లిం రిజర్వేషన్ల వ్యవహారంపై షేర్‌ చేసిన ఈ యానిమేటెడ్‌ వీడియోను తొలగించాలని కేంద్ర ఎన్నికల సంఘం ‘ఎక్స్‌’ను మంగళవారం ఆదేశించింది. కర్ణాటక సైబర్‌ క్రైం డివిజన్‌ పోలీసులు, చీఫ్‌ ఎలక్టోరల్‌ ఆఫీసర్‌ ఈ అభ్యంతరకర వీడియోపై మే 5న ‘ఎక్స్‌’ ప్రతినిధుల దృష్టికి తీసుకెళ్లినా, తొలగించలేదని లేఖలో పేర్కొంది. అందువల్ల తక్షణమే ఆ యానిమేటెడ్‌ వీడియోని తొలగించాలని ఆదేశిస్తూ ఈసీ లేఖ రాసింది.