నెల్లిమర్ల కొవిడ్‌ ఆసుపత్రిలో దారుణం

నెల్లిమర్ల: విజయనగరం జిల్లా పార్వతీపురం ప్రాంతానికి చెందిన చంద్రశేఖర్‌ సాహు(54) అనే వ్యక్తి జిల్లా మిమ్స్‌ కొవిడ్‌ ఆసుపత్రిలో నాలుగు రోజుల నుంచి కరోనా చికిత్స పొందుతున్నాడు. శ్వాస అందకపోవడంతో గురువారం రాత్రి మృతి చెందాడు. మృతదేహం ఈ రోజు ఉదయం మంచంపై నుంచి కింద పడి ఉంది. వైద్య సిబ్బంది మృతదేహాన్ని గమనించినా పట్టించుకోలేదు. 

 దీంతో వార్డులోని కరోనా బాధితులు మృతదేహాన్ని చూసి ఆందోళన చెందుతున్నారు. దీనిపై మిమ్స్‌ వైద్యుడు సాగర్‌ మాట్లాడుతూ...  కరోనా రోగి చనిపోయిన 7 గంటల వరకు వైరస్‌ ప్రభావం అధికంగా ఉంటుందని తెలిపారు. అందువల్ల మృతదేహాన్ని మార్చురీకి తరలించడానికి ఆలస్యమైందన్నారు. 7గంటల సమయం ముగిసిన తర్వాత మృతదేహాన్ని మార్చురీకి తరలిస్తామన్నారు. మృతుడి బంధువులకు సమాచారం ఇచ్చామని,  ఖననానికి ఏర్పాట్లు చేస్తున్నట్లు చెప్పారు.