బ్రాహ్మణి డేగ.. అందం భళా

తెలుపు రంగు ఛాతీ భాగం, గోధుమ రంగు రెక్కలు, బూడిద రంగు తోకతో ఆకర్షణీయంగా కనిపిస్తున్న ఈ పక్షిని ‘బ్రాహ్మణి డేగ’, ‘గరుడపక్షి’గా పిలుస్తారు. వనపర్తి జిల్లా మదనాపురం మండలం సరళాసాగర్‌ పరిసరాల్లో ఇది ‘ఈనాడు’ కెమెరాకు చిక్కింది. జడ్చర్లలోని డా.బీఆర్‌ఆర్‌ ప్రభుత్వ డిగ్రీ కళాశాలకు చెందిన జంతుశాస్త్ర సహాయ ఆచార్యులు బక్షి రవీందర్‌ ఈ పక్షికి సంబంధించిన ఆసక్తికర విషయాలు తెలియజేశారు. భారత ఉపఖండంతోపాటు దక్షిణ ఆసియా, ఆస్ట్రేలియా దేశాలలో ఉండే ఈ పక్షులు నీరున్న ప్రాంతాలలో చేపలను వేటాడుతూ కనిపిస్తాయి. వివిధ దేశాల్లో వీటిని పవిత్రమైనవిగా కొలుస్తారు. ‘ఆక్సీపిట్రీడే’ కుటుంబానికి చెందిన దాడి చేసే డేగలలో ఇది ఒకటి. దీని శాస్త్రీయ నామం ‘హేలియాస్తర్‌ ఇండస్‌’.