Telangana News: వాసవి గ్రూప్‌ స్థిరాస్తి సంస్థపై ఐటీ దాడులు.. 40 బృందాలతో సోదాలు

హైదరాబాద్‌: వాసవి గ్రూప్‌ స్థిరాస్తి సంస్థపై ఆదాయ పన్నుశాఖ దాడులు నిర్వహించింది. బంజారాహిల్స్‌లోని వాసవి గ్రూప్‌ ప్రధాన కార్యాలయంతో పాటు నగరంలోని వివిధ ప్రాంతాల్లో ఐటీ దాడులు కొనసాగుతున్నాయి. హైదరాబాద్‌ నగరంలో 40కి పైగా ఐటీ బృందాలు ఈ సోదాల్లో పాల్గొన్నట్టు అధికారులు తెలిపారు. వాసవి గ్రూపు ఛైర్మన్‌, వైస్‌ ఛైర్మన్‌, డైరెక్టర్ల ఇళ్లలో, సంస్థ ప్రధాన కార్యాలయం, అనుబంధ కార్యాలయాల్లోనూ ఆదాయపన్ను శాఖ సోదాలు చేస్తోంది. ఈ సంస్థ తమకు వస్తున్న ఆదాయానికి, ప్రభుత్వానికి చెల్లిస్తున్న ఆదాయపు పన్నుకు వ్యత్యాసం ఉన్నట్లు గుర్తించి కేసు నమోదు చేసినట్లు ఐటీ అధికారులు తెలిపారు. వాస్తవ ఆదాయం చూపడం లేదన్న ఆరోపణలపై ఐటీ సోదాలు చేస్తున్నట్లు వెల్లడించారు. ఇప్పటికే ఆ సంస్థకు చెందిన విలువైన పత్రాలు, ఎలక్ట్రానిక్‌ వస్తువులు స్వాధీనం చేసుకున్నట్లు తెలుస్తోంది.