సాయం కోసం బారులు తీరిన వరద బాధితులు

మీ సేవ కేంద్రాలకు పోటెత్తిన నగరవాసులు

హైదరాబాద్‌: నగరంలో ఇటీవల కురిసిన భారీ వర్షాలకు ముంపునకు గురైన బాధితులు వరద ఆర్థిక సాయం కోసం మీ సేవ కేంద్రాల వద్ద బారులు తీరుతున్నారు. ముంపునకు గురైన బాధితులకు తెలంగాణ ప్రభుత్వం రూ.10వేల ఆర్థిక సాయం అందిస్తున్న విషయం తెలిసిందే. ఇప్పటికే పలువురికి సాయం అందించినప్పటికీ కొందరికి అందలేదు. దీంతో నగదు అందనివారు మీ సేవ కేంద్రాల్లో తమ పేర్లు నమోదు చేసుకోవాలన్న సర్కారు సూచనల మేరకు బాధితులు మీ సేవ కేంద్రాల వద్దకు భారీగా తరలివస్తున్నారు. 

మీ సేవ కేంద్రాల్లో తమ పేర్లు నమోదు చేసుకున్న మరుసటి రోజునే నగదు వారి ఖాతాల్లో బదిలీ అవుతుండటంతో ఇవాళ చందానగర్‌లోని మీ సేవ కేంద్రం వద్దకు మహిళలు, వృద్ధులు పెద్ద సంఖ్యలో తరలివచ్చారు. అదేవిధంగా శేరిలింగంపల్లి పరిధిలో, అంబర్‌పేట గోల్నాకా, సీతాఫల్‌మండి, సనత్‌నగర్‌, మారేడ్‌పల్లి, అడ్డగుట్ట, ఎల్బీనగర్‌, వనస్థలిపురం పరిధిలోని మీ సేవ కేంద్రాలకు వరద బాధితులు క్యూ కట్టారు. అయితే, జీహెచ్‌ఎంసీ ఎన్నికల నోటిఫికేషన్‌ విడుదల కావడంతో తమకు నగదు బదిలీ అవుతుందో కాదోనన్న ఆందోళన బాధితులు వ్యక్తం చేస్తున్నారు.