Anand Mahindra: ఆది తమ్ముడు అజిత్‌ను చూశారా..? మహీంద్రా ఫన్నీ ట్వీట్‌

ముంబయి: ప్రముఖ వ్యాపారవేత్త ఆనంద్ మహీంద్రా చమత్కారం నెటిజన్లకు సుపరిచితమే. తాజాగా స్పోర్ట్స్‌ బ్రాండ్‌ అడిడాస్‌ నకిలీ బ్రాండ్‌కు సంబంధించిన చిత్రాన్ని షేర్ చేసి, తనదైనశైలిలో స్పందించారు. 

ప్రముఖ బ్రాండ్‌లను పోలినట్లు కనిపించే నకిలీ బ్రాండ్‌లు మార్కెట్లో చలామణీ అవుతూనే ఉంటాయి. మహీంద్రా షేర్ చేసిన చిత్రంలో షూ కూడా అచ్చం అడిడాస్ సంస్థదే అన్నట్లు ఉంది. ఆ సంస్థ లోగోలో ఉండే మూడు గీతలు యథావిధిగా కనిపిస్తున్నాయి. కానీ దగ్గరగా గమనిస్తే.. అడిడాస్ స్థానంలో అజిత్‌దాస్‌ అని ఉంది. దీనిపై మహీంద్రా స్పందిస్తూ.. ఇది లాజిక్ ప్రకారం సరైందేనన్నారు. ఆదికి అజిత్‌ అనే సోదరుడు ఉన్నాడేమోనని, వసుధైక కుటుంబంలో అదంతా సాధ్యమేనేమో అంటూ సరదాగా రాసుకొచ్చారు. దీనిపై నెట్టింట్లో కామెంట్ల వర్షం కురిసింది. 

‘ఈ అడిడాస్ పేరు గురించి మేం మా కాలేజ్‌ రోజుల్లో సరదాగా మాట్లాడుకునే వాళ్లం. ఆది, దాస్ అనే ఇద్దరు భారతీయ సోదరులు..విదేశాల్లో Adidasను స్థాపించారని మాట్లాడుకునేవాళ్లం’ అని ఒకరు ట్వీట్ చేశారు. ‘సర్‌ అజిత్‌దాస్‌ సంస్థ నుంచి మీరు ప్రమోషన్ ఫీజు తీసుకోవాలి’ అని మరొకరు చమత్కరించారు.