నా కుమార్తెకు స్కూల్లో బలవంతంగా కోడిగుడ్లు తినిపించారు.. తండ్రి ఫిర్యాదు!

శివమొగ్గ: రెండో తరగతి చదువుతున్న తన కుమార్తెకు పాఠశాలలో బలవంతంగా కోడిగుడ్లు తినిపించారని విద్యాశాఖ అధికారులకు ఓ తండ్రి ఫిర్యాదు చేశారు. ఈ ఘటన కర్ణాటకలోని శివమొగ్గలో వెలుగుచూసింది. చిన్నారి తండ్రి ఇచ్చిన ఫిర్యాదును తీవ్రంగా పరిగణించిన విద్యాశాఖ అధికారులు.. ఈ అంశంపై విచారణకు ఆదేశించారు. ప్రభుత్వ పాఠశాలలో మధ్యాహ్న భోజన పథకంలో భాగంగా తన కూతురికి గుడ్లు తినాలని బలవంతపెట్టారని, తద్వారా తమ  మనోభావాల్ని దెబ్బతీశారంటూ ఓ సామాజిక వర్గానికి చెందిన వ్యక్తి ఫిర్యాదు చేయడం స్థానికంగా కలకలం రేపింది. ఈ చర్యకు పాల్పడిన పాఠశాల ఉపాధ్యాయుడు, ప్రధానోపాధ్యాయుడిపై చర్యలు తీసుకోవాలని ఆయన డిమాండ్‌ చేశారు. అయితే, ఆ వ్యక్తి చేసిన ఆరోపణల్ని అధికారులు కొట్టిపారేశారు. 

తాము కఠినమైన శాకాహార డైట్‌ ఫాలో అవుతామని ముందే చెప్పామని.. అయినా సరే ఉపాధ్యాయులు తన కూతురికి బలవంతంగా గుడ్డు తినిపించారని అతడు ఆరోపించారు. దీనిపై స్పందించిన ఉన్నతాధికారులు ఈ ఘటనపై బ్లాక్‌ ఎడ్యుకేషన్‌ ఆఫీసర్‌తో విచారణకు ఆదేశించారు. మధ్యాహ్న భోజనం వడ్డిస్తున్న సమయంలో ఈ ఘటన జరిగినట్లు ప్రాథమికంగా గుర్తించినట్లు సీనియర్‌ అధికారి ఒకరు వెల్లడించారు. ‘‘విద్యార్థులంతా కలిసి మధ్యాహ్న భోజనానికి వరుసలో కూర్చున్నారు. అప్పుడే సంబంధిత ఉపాధ్యాయుడు గుడ్లు కావాల్సిన వారిని చేతులు ఎత్తాలని అడిగారు. ఈ చిన్నారి కూడా మిగిలిన విద్యార్థులతో కలిసి చేతులు ఎత్తినట్లు కనబడింది. దీంతో ఆమెకు గుడ్డు అందించారు. అంతేగానీ, ప్రత్యేకంగా ఈ చిన్నారితో పాటు ఎవరికీ గుడ్లు తినాలని బలవంత పెట్టలేదు’’ అని వివరించారు. 

ఇదే అంశంపై శివమొగ్గ పబ్లిక్‌ ఇన్‌స్ట్రక్షన్‌ డిప్యూటీ డైరెక్టర్‌ సీఆర్‌ పరమేశ్వరప్ప స్పందిస్తూ..  ఈ అంశాన్ని తీవ్రంగా పరిగణిస్తున్నట్లు చెప్పారు. కాకపోతే,  తమకు వచ్చిన సమాచారం ఆధారంగా ఆ చిన్నారికి  బలవంతంగా గుడ్డు వడ్డించలేదన్నారు. బ్లాక్‌ ఎడ్యుకేషన్‌ ఆఫీసర్‌ ఇచ్చిన నివేదికను పరిశీలించి.. ఏదైనా ఉల్లంఘనకు పాల్పడినట్లు తేలితే సంబంధిత వ్యక్తులపై చర్యలు తీసుకుంటామని చెప్పారు.