Telangana News: అవయవ దానంతో.. ఏడుగురికి ఆయువు పోసింది!

నల్గొండ: జీవన్మృతురాలైన ఓ మహిళ అవయవ దానం.. మరో ఏడుగురి ప్రాణాలు నిలిపింది. నల్గొండ జిల్లా బాలంకకు చెందిన సైదమ్మ.. ఈ నెల 8న నిద్రలోనే అపస్మారక స్థితిలోకి వెళ్లింది. వెంటనే కుటుంబసభ్యులు ఆమెను చికిత్స కోసం హైదరాబాద్‌లోని మలక్‌పేటలో యశోద ఆసుపత్రికి తీసుకువచ్చారు. వారం రోజుల పాటు వైద్యం అందించిన డాక్టర్లు.. బ్రెయిన్ డెడ్‌గా నిర్ధరించారు. ఈ విషయం తెలుసుకున్న జీవన్‌దాన్ వైద్య బృందం.. ఆమె కుటుంబ సభ్యులను కలిసి అవయవ దానం చేసేందుకు ఒప్పించారు. ఆమె రెండు మూత్రపిండాలు, కాలేయం, ఊపిరి తిత్తులు, కంటి కార్నియాలను సేకరించి ప్రాణాపాయ స్థితిలో ఉన్న రోగులకు అమర్చారు.