Antibiotics: యాంటీ బయోటిక్స్‌ ఇష్టం వచ్చినట్టు వాడొద్దు..!

ఇంటర్నెట్‌ డెస్క్‌: ప్రతి చిన్న జబ్బుకు యాంటీ బయోటిక్స్‌ వాడకం ఎక్కువైంది. దీంతో ఉన్న కొద్దిపాటి మందులకు వ్యాధి నిరోధకత వచ్చేస్తుంది. చివరకు అవి ఎందుకూ కొరకాకుండా పోతున్నాయి. కొంత అవగాహన లేకపోవడం, మరికొంత మందుల దుకాణాలతో జరుగుతోంది. ఈ నేపథ్యంలో యాంటీ బయోటిక్స్‌ ఎలా వాడాలి..? వాటి పర్యవసానం ఎలా ఉంటుందో సర్జికల్‌ గ్యాస్ట్రో ఎంటరాలజిస్టు డాక్టర్‌ ఎంబీవీ ప్రసాద్‌ వివరించారు.

ఇది మంచిది కాదండోయ్‌

చాలా మంది సొంత వైద్యం చేసుకుంటారు. తలనొప్పిలాంటి మందులైతే పరవాలేదు.. కానీ అన్నింటికీ యాంటీబయోటిక్స్‌ విచ్చలవిడిగా వినియోగిస్తున్నారు. జలుబు, దగ్గు వచ్చినప్పుడు ఒక రోజు చూసి తగ్గకపోతే వాడేస్తున్నారు. వ్యాధి నిరోధకత శరీరం పెంచుకోకుండా మందుల వైపు వెళ్తున్నారు. తర్వాత ఇతర జబ్బులకు ఈ మందులు పని చేయడం లేదు. మళ్లీ మోతాదు పెంచి రెండు, మూడు రకాల యాంటీబయోటిక్స్‌ మందులు ఇవ్వాల్సి వస్తుంది. సాధ్యమైనంత వరకు వైద్యుల సూచన లేకుండా మందులను వాడొద్దు.