Ram Charan: మనం నడిచే నేల, పీల్చే గాలిపై వారి సంతకం ఉంటుంది: రామ్‌ చరణ్‌

హైదరాబాద్‌: దేశభద్రతను కాపాడుతోన్న జవాన్ల త్యాగాన్ని గౌరవించుకోవడం మన అందరి బాధ్యత అని మెగా హీరో రామ్‌చరణ్‌ అన్నారు. ఆజాదీకా అమృత్‌ మహోత్సవ్‌లో భాగంగా సికింద్రాబాద్‌ పరేడ్‌ గ్రౌండ్స్‌లోని యుద్ధవీరుల స్మారక స్తూపం వద్ద నివాళులర్పించిన అనంతరం ఆయన మాట్లాడారు. ఈ  కార్యక్రమంలో పాల్గొనడం తన అదృష్టమని పేర్కొన్నారు. ‘దేశం ప్రశాంతంగా ఉందంటే అది సైనికుల వల్ల మాత్రమే. దేశవీరుల ధైర్యం గురించి ఎంత చెప్పుకున్నా తక్కువే. వారి త్యాగాలను ఎవ్వరూ మర్చిపోకూడదు. మనం నడిచే నేల, పీల్చే గాలి, బతికే దేశం.. వీటన్నింటిపై  సైనికుల సంతకం ఉంటుందన్న విషయం అందరూ గుర్తుపెట్టుకోవాలి’ అని రామ్‌చరణ్‌ అన్నారు. ఈ సందర్భంగా తాను నటించిన ధ్రువ సినిమాను గుర్తుచేసుకుంటూ ఆ సినిమాలో ఆర్మీ జవాన్‌ పాత్ర పోషించడం ఎంతో గర్వంగా ఉందన్నారు.