Telangana News: మళ్లీ విధుల్లోకి ఉపాధిహామీ ఫీల్డ్ అసిస్టెంట్లు.. మంత్రి ఎర్రబెల్లి ఆదేశాలు

హైదరాబాద్‌: తెలంగాణలో ఉపాధిహామీ ఫీల్డ్ అసిస్టెంట్లను రాష్ట్ర ప్రభుత్వం మళ్లీ విధుల్లోకి తీసుకుంది. గతంలో రాష్ట్ర ప్రభుత్వం ఫీల్డ్ అసిస్టెంట్లను తొలగించింది. అయితే మళ్లీ తమను విధుల్లోకి తీసుకోవాలని డిమాండ్ చేస్తూ వారు ఆందోళనకు దిగారు. పార్టీ నేతలు, ఇతర రూపాల్లో వచ్చిన విజ్ఞప్తులు, డిమాండ్లను పరిగణనలోకి తీసుకున్న ముఖ్యమంత్రి కేసీఆర్.. ఫీల్డ్ అసిస్టెంట్లను విధుల్లోకి తీసుకుంటామని బడ్జెట్ సమావేశాల సందర్భంగా అసెంబ్లీలో ప్రకటించారు. సీఎం కేసీఆర్ నిర్ణయానికి అనుగుణంగా వారిని విధుల్లోకి తీసుకోవాలని ఆదేశిస్తూ రాష్ట్ర పంచాయతీరాజ్ శాఖ మంత్రి ఎర్రబెల్లి దయాకర్ రావు ఆదేశాలు జారీ చేశారు. నేటి నుంచి విధుల్లోకి తీసుకోవాలని జిల్లాల కలెక్టర్లు, అధికారులకు మంత్రి స్పష్టం చేశారు. దీంతో 7,305 మంది ఫీల్డ్ అసిస్టెంట్లు వారి పాత స్థానాల్లోనే విధులు నిర్వహించనున్నారు.