మండే ఎండలో వినూత్నంగా పెళ్లి ఊరేగింపు.. చూడండి..

ఇంటర్నెట్‌ డెస్క్‌: అసలే పెళ్లిళ్ల సీజన్‌. మరోవైపు మండుతోన్న ఎండలు. భగభగమండే ఎండల్లో పెళ్లి ఊరేగింపులు, ఇతరత్రా కార్యక్రమాలు కష్టంగా మారుతున్నాయి. అయితే.. ఈ ఎండవేడి నుంచి తప్పించుకోవడానికి ఓ పెళ్లి బృందం కాస్త విభిన్నంగా ప్రయత్నించింది. ఇందుకు సంబంధించిన వీడియో ప్రస్తుతం వైరల్‌గా మారింది. ఈ వీడియోలో పెళ్లి కొడుకు గుర్రంపై కూర్చొని ఉండగా.. బంధువులు, స్నేహితులందరూ డ్యాన్స్‌లు చేస్తూ ఊరేగింపులో పాల్గొన్నారు. అయితే ఎండవేడి నుంచి తప్పించుకునేందుకు పసుపు రంగు పరదా లాంటి దానిని టెంటులాగా ఏర్పాటు చేసుకొన్నారు. ‘భారతీయులు పెళ్లిళ్లకు కొత్త ఆవిష్కరణను రూపొందించారు. భానుడి భగభగల నుంచి తప్పించుకునేందుకు ఇలా టెంట్‌ ఏర్పాటు చేసుకొని బరాత్‌ జరుపుకొంటున్నారు’ అని  ఈ వీడియోకి క్యాప్షన్‌ జోడించారు. బుధవారం పోస్టు చేసిన ఈ  వీడియోను ఇప్పటివరకూ 18వేల మంది వీక్షించగా కొంతమంది నెటిజన్లు తమ అభిప్రాయాలను కామెంట్ల రూపంలో పంచుకున్నారు.