పీఎం కేర్స్‌: 5రోజుల్లో రూ.3వేల కోట్లు..!

స్పష్టం చేసిన ఆడిటర్ల నివేదిక
దాతల పేర్లు ఎందుకు వెల్లడించడం లేదన్న చిదంబరం

దిల్లీ: కరోనా వైరస్‌ను ఎదుర్కోవడంలో భాగంగా మోదీ ప్రభుత్వం మార్చి నెలలో పీఎం కేర్స్‌ నిధిని ఏర్పాటు చేసింది. ప్రభుత్వానికి ఆర్థిక సాయం చేయాలనుకునేవారు ఈ నిధికి విరాళాలు అందించవచ్చని పేర్కొంది. ఈ నిధి ప్రారంభమైన ఐదురోజుల్లోనే రూ.3076 కోట్లు జమ అయ్యాయి. మార్చి 27వ తేదీ నుంచి మార్చి 31 వరకు ఈ మొత్తం(రూ.30,76,62,58,096) చేకూరినట్లు తాజాగా ఆడిట్‌ నివేదిక స్పష్టం చేసింది. ఈ నివేదికను పీఎం కేర్స్‌ వెబ్‌సైట్‌లో ప్రజలకు అందుబాటులో ఉంచింది. అయితే మార్చి 31తర్వాత వచ్చిన విరాళాల గురించి ఇందులో ప్రస్తావించలేదు.

ఈ ప్రత్యేక నిధిని రూ.2,25,000ల కార్పస్‌ ఫండ్‌తో మార్చి 27న ప్రారంభించారు. అనంతరం ప్రధానమంత్రి నరేంద్ర మోదీ పిలుపుమేరకు పీఎం కేర్స్‌ నిధికి భారీగా విరాళాలు వచ్చాయి. కేవలం భారత్‌నుంచి కాకుండా విదేశాల నుంచి విరాళాలు ఇచ్చేందుకు పీఎం కేర్స్‌ వెసులుబాటు కల్పించింది. అయితే, దీనిపై తాజాగా కాంగ్రెస్‌ సీనియర్‌ నేత పి.చిదంబరం విమర్శలు గుప్పించారు. విరాళాలు ఇచ్చిన దాతల పేర్లు ఎందుకు వెల్లడించడం లేదని ప్రశ్నించారు. దాతల పేర్లు బహిర్గతం చేయడానికి ట్రస్టీలు ఎందుకు భయపడుతున్నారని ప్రశ్నించారు.