Covishiled: అదర్‌ పూనావాలా హామీ ఇచ్చారు

టీకా డోసుల పంపిణీపై మహారాష్ట్ర ప్రభుత్వం

ముంబయి: రెండో దశ కొవిడ్ ఉద్ధృతి నేపథ్యంలో.. అర్హులందరికీ వేగంగా టీకాలు అందించాలని ప్రభుత్వాలు ప్రయత్నాలు చేస్తున్నాయి. ఈ క్రమంలో తమకు మే 20 తరవాత 1.5 కోట్ల కొవిషీల్డ్‌ డోసులు అందనున్నాయని మహారాష్ట్ర ప్రభుత్వం వెల్లడించింది. ఈ మేరకు సీరం సంస్థ సీఈఓ అదర్‌ పూనావాలా ముఖ్యమంత్రి ఉద్ధవ్ ఠాక్రేకు హామీ ఇచ్చారని తెలిపింది. రాష్ట్రంలో కరోనా విజృంభణ కట్టడికి తీసుకోవాల్సిన చర్యలపై బుధవారం నిర్వహించిన సమావేశం అనంతరం ఈ ప్రకటన చేసింది. 

‘మే 20 తరవాత 1.5కోట్ల  కొవిషీల్డ్‌ టీకా డోసులను మహారాష్ట్రకు అందజేస్తామని సీరం సంస్థ సీఈవో అదర్ పూనావాలా ముఖ్యమంత్రికి హామీ ఇచ్చారు. ఆ డోసులు అందిన తరవాత 18 నుంచి 44 సంవత్సరాల వయసు వారికి టీకా వేయడం ప్రారంభిస్తాం’ అని మహారాష్ట్ర ఆరోగ్య శాఖ మంత్రి రాజేశ్ తోపే వెల్లడించారు. కేంద్రం అనుమతించినప్పటికీ, టీకాల కొరత కారణంగా ప్రస్తుతం ఈ వయసు వారికి అక్కడి ప్రభుత్వం టీకాలు అందించడంలేదు. ప్రస్తుతం అందుబాటులో ఉన్న టీకాలను కూడా 45ఏళ్లు పైబడిన వారికే కేటాయించనుంది. అలాగే లాక్‌డౌన్ గురించి మంత్రి మాట్లాడుతూ.. మరో 15 రోజుల పాటు లాక్‌డౌన్‌ను పొడిగించాలని ప్రతిపాదనలు వచ్చాయని, ఈ అంశంపై ముఖ్యమంత్రి తుది నిర్ణయం తీసుకుంటారని తెలిపారు. మహారాష్ట్రలో తాజాగా 46,781 మంది కరోనా బారిన పడగా..816 మరణాలు సంభవించాయి. ఇప్పటి వరకు 52,26,710 మందికి వైరస్ సోకింది. 46లక్షల మందికి పైగా కోలుకున్నారు.