NEET-PG: నీట్‌-పీజీ పరీక్షను వాయిదా వేయలేం: సుప్రీంకోర్టుకు చెప్పిన ఎన్‌బీఈ

దిల్లీ: నీట్‌-పీజీ రాసేందుకు 2.09 లక్షల మంది దరఖాస్తు చేసుకున్నారని.. మార్చి 5న జరగాల్సిన ఈ పరీక్షకు అన్ని ఏర్పాట్లు పూర్తి చేశామని.. ప్రస్తుత పరిస్థితుల్లో వాయిదా వేయలేమని నేషనల్‌ బోర్డ్‌ ఆఫ్‌ ఎగ్జామినేషన్‌(ఎన్‌బీఈ).. సుప్రీంకోర్టుకు తెలిపింది. ‘‘పరీక్ష వాయిదావేస్తే సమీప భవిష్యత్తులో ప్రత్యామ్నాయ తేదీ కూడా అందుబాటులో లేదు’’ అని పేర్కొంది. ఈ పరీక్షను 3 నెలలు పాటు వాయిదా వేయాలంటూ దాఖలైన పలు పిటిషన్లపై జస్టిస్‌ ఎస్‌.ఆర్‌.భట్‌, జస్టిస్‌ దీపంకర్‌ దత్తా ధర్మాసనం శుక్రవారం విచారించింది. వాయిదా వేయకపోతే ఎంత మందిపై ప్రభావం పడుతుందని ధర్మాసనం ప్రశ్నించింది. దీనికి పిటిషనర్ల తరఫు న్యాయవాది సమాధానమిస్తూ 45 వేల మంది అని చెప్పారు. ఈ సమస్యకు ఎన్‌బీఈ ఒక పరిష్కారంతో రావాలని కోరుతూ ధర్మాసనం తదుపరి విచారణను ఈ నెల 27కు వాయిదా వేసింది.