Indian Railways: ముంబయి- అహ్మదాబాద్‌ రైలు మార్గం.. 622 కి.మీల మేర కంచె నిర్మాణం!

దిల్లీ: ముంబయి- అహ్మదాబాద్‌ మార్గంలో పశువులను ఢీకొని ‘వందే భారత్‌ ఎక్స్‌ప్రెస్(Vande Bharat Express)‌’ రైలు రెండు సందర్భాల్లో నిలిచిపోయిన విషయం చర్చనీయాంశమైన తెలిసిందే. ఈ క్రమంలోనే భవిష్యత్తులో ఈ తరహా ప్రమాదాల(Cattle Run Over)ను నివారించేందుకు, పట్టాలపై పశువుల సంచారాన్ని కట్టడి చేసేందుకు రైల్వేశాఖ(Indian Railway) ముందుకొచ్చింది. ముంబయి- అహ్మదాబాద్‌ల మధ్య 622 కిలోమీటర్ల పొడవునా కంచె(Metal Beam Fencing) నిర్మాణ పనులు ప్రారంభించింది. దీనికి సంబంధించిన వీడియోను రైల్వేశాఖ మంత్రి అశ్విని వైష్ణవ్‌(Ashwini Vaishnaw) ట్విటర్‌ వేదికగా పోస్ట్‌ చేశారు.

కంచె ఏర్పాటు పనులకు దాదాపు రూ.245.26 కోట్లు ఖర్చు అవుతుందని అధికారులు అంచనా వేస్తున్నారు. మొత్తం ఎనిమిది టెండర్లు పూర్తయ్యాయని, పనులు శరవేగంగా జరుగుతున్నాయని రైల్వేశాఖ ఆదివారం వెల్లడించింది. మే నెలాఖరులోగా పనులు పూర్తి చేయాలని భావిస్తున్నట్లు తెలిపింది. ఇదిలా ఉండగా.. గాంధీనగర్- ముంబయిల మధ్య అక్టోబర్‌ 1 నుంచి ‘వందే భారత్‌’ సేవలు ప్రయాణికులకు అందుబాటులోకి వచ్చాయి. అయితే ఒకసారి గేదెల గుంపును ఢీకొని, మరోసారి ఆవును ఢీకొని ఈ రైలు నిలిచిపోయింది. దీంతో రైల్వే అధికారులు పరిష్కార చర్యలు చేపట్టారు.