ఆహార ధాన్యాల పంపిణీకి కేబినెట్‌ ఆమోదం

దిల్లీ: పేదలకు ఉచితంగా ఆహార ధాన్యాలు అందించేందుకు కేంద్ర మంత్రివర్గం ఆమోదం తెలిపింది. మే, జూన్‌ నెలల్లో పేదలకు ఒక్కొక్కరికి 5 కిలోల చొప్పున కేంద్ర ప్రభుత్వం ఉచితంగా ఆహార ధాన్యాలు అందించనుంది. ఇందుకు మంత్రివర్గ ఆమోదం లభించింది. ప్రధానమంత్రి గరీబ్‌ కల్యాణ్ అన్న యోజన మూడో దశ కింద కేంద్రం ఉచిత ఆహార ధాన్యాలను అందిస్తోంది. ఈ కార్యక్రమం ద్వారా దేశవ్యాప్తంగా 79.88 కోట్ల మందికి లబ్ధి చేకూరనుంది. ఇందుకోసం కేంద్రం రూ.25,333 కోట్లను ఖర్చుచేయనుంది. 36,789 మెట్రిక్  టన్నుల బియ్యాన్ని.. 25,731 మెట్రిక్  టన్నుల గోధుమలను పంపిణీ చేయనుంది.

దేశంలో కరోనా రెండో దశ విజృంభిస్తున్న వేళ గత నెలలో కేంద్ర ప్రభుత్వం కీలక నిర్ణయం తీసుకుంది. కరోనా కారణంగా అనేక మంది ఉపాధి కోల్పోతున్నారు. ఇలాంటి వారు ఆకలితో అలమటించకూడదన్న ఉద్దేశంతోనే ఆహార ధాన్యాలు పంపిణీ చేయాలని కేంద్రం నిర్ణయించింది.