Nitin Gadkari: నేనూ మీ బెంజ్‌ కారు కొనలేను.. గడ్కరీ ఆసక్తికర వ్యాఖ్య

ముంబయి: విలాసవంతమైన కార్ల తయారీ సంస్థ మెర్సిడెస్‌ బెంజ్ ఇండియాకు కేంద్రమంత్రి నితిన్ గడ్కరీ ఓ సూచన చేశారు. భారత్‌లో ఆ సంస్థ ఉత్పత్తిని పెంచాలని కోరారు. దానివల్ల ధర తగ్గుతుందని, ప్రజలు కొనుగోలు చేసేందుకు ముందుకు వస్తారని చెప్పారు. ధర ఎక్కువగా ఉండటంతో ఈ కారు తాను కూడా కొనలేనని సరదాగా వ్యాఖ్యానించారు. 

శుక్రవారం పుణెలోని చకన్ తయారీ యూనిట్‌లో దేశీయంగా అసెంబుల్ చేసిన EQS 580 4MATIC EVని ఆవిష్కరించిన సందర్భంగా మంత్రి మాట్లాడారు. ‘మీరు ఉత్పత్తి పెంచండి. అప్పుడు ధర తగ్గే అవకాశం ఉంటుంది. మేమంతా మధ్యతరగతి వాళ్లం. ఈ కారు నేను కూడా కొనలేను’ అని అన్నారు. ఇదిలా ఉంటే.. ఈ సరికొత్త ఈవీ ధర రూ.1.55 కోట్లుగా ఉంది. 

అలాగే దేశంలో ఎలక్ట్రిక్ వాహనాలకు పెద్ద మార్కెట్ ఉందని మంత్రి వెల్లడించారు. దేశంలో 15.7 లక్షల ఈవీలు రిజిస్టర్ అయ్యాయని  చెప్పారు. వీటి విక్రయాలు 335 శాతం పెరిగాయన్నారు. దేశంలో హైవేల నిర్మాణం వేగంగా సాగుతోందని, దానివల్ల బెంజ్ కార్లకు మంచి మార్కెట్ ఉంటుందని తెలిపారు.