రేపు షా నివాసానికి వెళ్తాం..

దిల్లీ: పౌరసత్వ సవరణ చట్టానికి వ్యతిరేకంగా దిల్లీలోని షాహిన్‌బాగ్‌ నిరసనకారులు ఆదివారం కేంద్ర హోంమంత్రి అమిత్‌షా నివాసానికి వెళ్లేందుకు పిలుపునిచ్చారు. సీఏఏను వెనక్కి తీసుకోవాలనే తమ ప్రధాన డిమాండుతో అమిత్‌షాతో చర్చించేందుకు ఆయన నివాసానికి ర్యాలీగా వెళ్లనున్నట్లు నిరసనకారులు పేర్కొన్నారు. రేపు మధ్యాహ్నం 2గంటలకు వారు ర్యాలీ ప్రారంభించనున్నట్లు సమాచారం. దీనిపై ఓ మీడియా సంస్థ హోంమంత్రిత్వ శాఖ అధికారులను ఆరా తీయగా.. తమకు ఎలాంటి సమాచారం లేదని వెల్లడించారు.

ఈ సందర్భంగా నిరసనకారులు మీడియాతో మాట్లాడుతూ.. తాము సీఏఏ విషయమై చర్చించేందుకు అమిత్‌షా ఇంటికి వెళ్లాలని నిర్ణయించుకున్నట్లు తెలిపారు. సీఏఏ వల్ల ఎవరికైనా ఏమైనా సమస్య ఉంటే తనను వచ్చి కలవమని గతంలో అమిత్‌షానే చెప్పారు. కాబట్టి తాము రేపు ఆయనను కలిసి తమ సమస్యను చర్చించనున్నట్లు చెప్పారు. సీఏఏకు పార్లమెంటులో ఆమోదం తెలిపినప్పటి నుంచి.. షాహిన్‌బాగ్‌లో ఆ చట్టానికి వ్యతిరేకంగా నిరసనలు కొనసాగుతున్న విషయం తెలిసిందే.