ఇలాంటివి పునరావృతం కాకుండా ప్రతిజ్ఞ చేయాలి

దిల్లీ: నిర్భయ దోషులకు ఉరిశిక్ష అమలు చేయడంపై దిల్లీ సీఎం అరవింద్‌ కేజ్రీవాల్‌ శుక్రవారం స్పందించారు. బాధితులకు న్యాయం జరగడానికి దాదాపు ఏడు సంవత్సరాల కాలం పట్టిందన్నారు. నిర్భయ వంటి ఘటనలు పునరావృతం కాకుండా అందరూ ప్రతిజ్ఞ చేయాలన్నారు. ఇటీవల ఈ దోషులు చట్టాన్ని ఎలా తప్పుదోవ పట్టించారో అందరూ చూశారన్నారు. ఇంకా మన వ్యవస్థలో ఇలాంటివి చాలా లోటుపాట్లు ఉన్నాయన్నారు. వాటిని మెరుగు పరచవలసిన అవసరం ఉందని పేర్కొన్నారు. దేశంలోనే సంచలనం సృష్టించిన నిర్భయ కేసులో దోషులను శుక్రవారం ఉదయం తిహార్‌ జైల్లో ఉరి తీసిన విషయం తెలిసిందే.