ట్రంప్‌ ప్రతిపాదనను తోసిపుచ్చిన మెర్కెల్‌

బెర్లిన్‌: అమెరికాలో జరగబోయే జీ-7 దేశాల సదస్సుకు జర్మనీ ఛాన్స్‌లర్‌ ఏంజెలా మెర్కెల్‌ హాజరుకాబోరని ఆమె కార్యాలయం ప్రకటించింది. ఒకవేళ కరోనా వైరస్ వ్యాప్తి భారీగా తగ్గుముఖం పడితే ఈ నిర్ణయంపై పునరాలోచిస్తామని తెలిపింది. కానీ, ప్రస్తుత పరిస్థితుల్లో మాత్రం ఆమె హాజరయ్యే అవకాశమే లేదని తేల్చి చెప్పింది. వాస్తవానికి ఈ సదస్సు జూన్‌ 10-12 మధ్య జరగాల్సి ఉండగా.. కరోనా సంక్షోభం నేపథ్యంలో రద్దు చేస్తున్నట్లు ఇప్పటికే ప్రకటించారు. కానీ, ఇటీవల ఓ సందర్భంలో ట్రంప్‌ మాట్లాడుతూ.. జీ-7 దేశాల సదస్సు ఆయా దేశాధినేతల వ్యక్తిగత హాజరు నడుమ జరపాలనుకుంటున్నానని తెలిపారు. ఇంతకంటే పెద్ద పునఃప్రారంభం ఏముంటుందని వ్యాఖ్యానించారు. తద్వారా సాధారణ పరిస్థితులు నెలకొంటున్నాయన్న సందేశాన్ని ప్రపంచానికి ఇచ్చే అవకాశం ఉందని అభిప్రాయపడ్డారు. ఈ నేపథ్యంలో స్పందించిన మెర్కెల్‌ తాజాగా ఆమె నిర్ణయాన్ని వెల్లడించారు.