ఆ శానిటైజర్లు అత్యంత ప్రమాదకరం

అప్రమత్తంగా ఉండాలని సూచించిన సీబీఐ

దిల్లీ: దేశంలో కరోనా విజృంభిస్తున్న నేపథ్యంలో మార్కెట్లో నకిలీ శానిటైజర్లు లభ్యమయ్యే ప్రమాదం ఉందని అన్ని రాష్ట్రాలు, కేంద్రపాలిత ప్రాంతాల పోలీసులను సీబీఐ అప్రమత్తం చేసింది. అత్యంత విషపూరితమైన మిథనాల్ రసాయనాన్ని ఉపయోగించి తయారు చేసిన నకిలీ శానిటైజర్లను విక్రయించే ముఠాల కదలికలపై ఇంటర్‌పోల్ హెచ్చరిక నేపథ్యంలో పోలీసులంతా అప్రమత్తంగా ఉండాలని సీబీఐ కోరింది. కొన్ని దేశాల్లో మిథనాల్‌ను ఉపయోగించి నకిలీ హ్యాండ్ శానిటైజర్లు తయారుచేసినట్లు తెలుసుకున్న ఇంటర్‌పోల్ తాజాగా సీబీఐని హెచ్చరించింది. 

‘కరోనా మహమ్మారి విజృంభిస్తున్న నేపథ్యంలో శానిటైజర్లకు విదేశాల్లో భారీ డిమాండ్ ఏర్పడింది. దీన్నే అదునుగా భావించి కొన్ని ముఠాలు నకిలీ హ్యాండ్ శానిటైజర్లను ఉత్పత్తి చేయడానికి మిథనాల్‌ను వాడుతున్నట్లు తెలిసింది. విషపూరితమైన మిథనాల్ రసాయనం మానవ శరీరానికి అత్యంత ప్రమాదకరమైనది’ అని సీబీఐ వెల్లడించింది. పీపీఈ కిట్లు, ఇతర రక్షణ పరికరాల సరఫరాదారులుగా పేర్కొంటూ కొందరు నేరస్థులు ఆన్‌లైన్ ఖాతాదారులను మోసం చేస్తున్నారని తెలిపింది. భారీగా పెరుగుతున్న ఆన్‌లైన్ ముందస్తు చెల్లింపు మోసాలను కట్టడిచేయాలని హెచ్చరికలు జారీ చేసింది.