రెండు దేశాలు కలిసి నడవాలి

భారత్-చైనా వివాదంపై దలైలామ వ్యాఖ్యలు

దిల్లీ: భారత్-చైనా పక్కపక్కనే ఉండే రెండు బలమైన దేశాలని, ఒకరిని ఇంకొకరు నాశనం చేసేందుకు ప్రయత్నించకూడదని ప్రముఖ బౌద్ధ గురువు దలైలామా ఇరు దేశాలను కోరారు. దాదాపు రెండు నెలలుగా వాస్తవాధీన రేఖ వెంబడి నెలకొన్న అనిశ్చిత పరిస్థితులను తొలగించుకునేందుకు ఇరు దేశాలు ప్రయత్నిస్తున్న తరుణంలో దలైలామా వ్యాఖ్యలు ప్రాధాన్యం సంతరిచుకున్నాయి.

‘‘రెండూ శక్తిమంతమైన దేశాలు కలిసి జీవించాలి. ప్రపంచంలోనే అత్యధిక జనాభా కలిగిన ఈ రెండు దేశాల మధ్య ఇటీవలి కాలంలో కొంత పోటీ భావన కనిపించింది. పూర్వం చైనా నుంచి బౌద్ధ గ్రంథాలను అనువదించేందుకు పలువురు పండితులు భారత్‌కు వచ్చారు. ఇలాంటి చారిత్రక సంబంధాలు ఇరు దేశాల మధ్య ఉన్నాయి. చారిత్రాత్మకంగా చైనా బౌద్ధ దేశం, భారత్ బుద్ధుడు నడచిన భూమి’’ అని ఒక అంతర్జాతీయ వార్తా సంస్థకు ఇచ్చిన ఇంటర్వ్యూలో పేర్కొన్నారు.