గోధ్రా రైలు బోగీ దహనం కేసు దోషులకు బెయిల్‌పై మీ స్పందనేంటి?

గుజరాత్‌ ప్రభుత్వాన్ని కోరిన సుప్రీం

దిల్లీ: గుజరాత్‌లో 2002లో జరిగిన గోధ్రా రైలు బోగీ దహనం కేసులో జీవిత ఖైదు శిక్ష పడిన నిందితుల్లో కొందరి బెయిల్‌ పిటిషన్లపై స్పందన తెలియజేయాలని గుజరాత్‌ ప్రభుత్వాన్ని సుప్రీంకోర్టు సోమవారం కోరింది. ‘‘కొందరు తాము రాళ్లు మాత్రమే విసిరామని చెబుతున్నారు. కానీ ఓ బోగీని తలుపులు తెరుచుకోకుండా బయట నుంచి బంధించేసి..ఆపై దానికి నిప్పు పెట్టి.. ఆ తరువాత దానిపై రాళ్లు విసరడమంటే ఏదో కేవలం రాళ్లు విసరడం కాదు. ఆ దుర్ఘటనలో రైల్లోని అనేక మంది మృత్యువాత పడ్డారు’’ అని గుజరాత్‌ ప్రభుత్వం తరఫున హాజరైన సొలిసిటర్‌ జనరల్‌ తుషార్‌ మెహతా ప్రధాన న్యాయమూర్తి జస్టిస్‌ డి.వై.చంద్రచూడ్‌, జస్టిస్‌ పి.ఎస్‌.నరసింహా, జస్టిస్‌ జె.బి.పార్దివాలాల ధర్మాసనానికి వివరించారు. ఈ సందర్భంగా ఈ బెయిల్‌ పిటిషన్‌ కేసును రెండు వారాల అనంతరం విచారణ జాబితాలో చేరుస్తామని ధర్మాసనం మెహతాకు తెలిపింది. ఈ కేసులో దోషులుగా తేలిన కొందరి మరణశిక్షను గుజరాత్‌ హైకోర్టు జీవిత ఖైదుగా మార్చడంపై ఆ రాష్ట్ర ప్రభుత్వం అప్పీలుకు వెళ్లిందని కొందరు దోషుల తరఫున హాజరైన సీనియర్‌ న్యాయమూర్తి సంజయ్‌ హెగ్డే ధర్మాసనానికి వివరించారు. ఈ నేపథ్యంలో అబ్దుల్‌ రహమాన్‌ ధాంతియా అలియాస్‌ కాన్‌కాటో, అబ్దుల్‌ సత్తార్‌ ఇబ్రహీం గడ్డీ అస్లా తదితరుల బెయిల్‌ అభ్యర్థనల కేసులో అభ్యంతరాలు ఉంటే తెలపాలంటూ గుజరాత్‌ ప్రభుత్వానికి సుప్రీం ధర్మాసనం నోటీసులు జారీ చేసింది.