Modi: భారతీయ విలువలే 9/11 వంటి దాడులకు పరిష్కారం: మోదీ

అహ్మదాబాద్‌: అమెరికాలోని ప్రపంచ వాణిజ్య సంస్థ భవంతులపై ఉగ్రదాడి జరిగి 20 ఏళ్లు అయిన సందర్భంగా ప్రధాని నరేంద్ర మోదీ స్పందించారు. 9/11 ఘటనను మానవత్వంపై జరిగిన దాడిగా అభివర్ణించారు. మనుషుల్లో మానవతా విలువల్ని పెంపొందించడం ద్వారానే ఇలాంటి మారణహోమాల్ని అరికట్టగలమని అభిప్రాయపడ్డారు. అహ్మదాబాద్‌లో నూతనంగా నిర్మించిన సర్దార్‌ధామ్‌ భవన్‌ను శనివారం ప్రారంభిస్తూ మోదీ ఈ వ్యాఖ్యలు చేశారు. ఈ సందర్భంగా సెప్టెంబరు 11వ తేదీకి ఉన్న ప్రాముఖ్యతను గుర్తుచేశారు.

అలాగే కొన్నేళ్ల క్రితం ఇదే రోజున స్వామి వివేకానంద షికాగోలో ప్రసంగించినట్లు గుర్తు చేశారు. ఈ ప్రసంగం ఇప్పటికీ ప్రపంచవ్యాప్తంగా ఎంతో గుర్తింపు పొందిన విషయం తెలిసిందే. ఈ రోజున భారతీయ సంప్రదాయంలోని మానవతా విలువలను వివేకానందుడు ప్రపంచానికి పరిచయం చేశారన్నారు. ఆ విలువలే 9/11 వంటి దాడులకు పరిష్కారం చూపగలవన్నారు. ఈ విషయాన్ని యావత్ ప్రపంచం క్రమంగా గుర్తిస్తోందన్నారు. 

అలాగే తమిళ కవి సుబ్రహ్మణ్య భారతి 100వ వర్థంతి నేపథ్యంలో బనారస్‌ హిందూ విశ్వవిద్యాలయంలో ఆయన పేరిట తమిళ భాషాధ్యయనంపై పీఠం ఏర్పాటు చేస్తామని మోదీ ఈ సందర్భంగా  ప్రకటించారు.