North Korea: ఉ.కొరియాలోకి ప్రవేశించిన ద.కొరియా వాసి..!

ఇంటర్నెట్‌డెస్క్‌: ఉత్తర కొరియా-దక్షిణ కొరియా మధ్య ఉన్న నిస్సైనిక మండలంలోకి ఒక సామాన్యుడు ప్రవేశించాడు. అతను ద.కొరియా నుంచి ఉ.కొరియాలోకి వెళ్లినట్లు అధికారులు గుర్తించారు. దీంతో ఆ వ్యక్తి కోసం దక్షిణ కొరియా సైనిక అధికారులు తీవ్ర గాలింపు చర్యలు చేపట్టారు. కానీ, ఆచూకీ లభించలేదు. మరోవైపు ఉత్తర కొరియా అధికారులకు కూడా ఆ వ్యక్తి గురించి సమాచారం అందజేశారు. కానీ, అతను జీవించి ఉన్నాడని మాత్రం చెప్పలేకపోతున్నారు. ఎందుకంటే విదేశీయులు ఉత్తర కొరియాలో అక్రమంగా ప్రవేశిస్తే కాల్చివేయాలనే ఆదేశాలు అమల్లో ఉన్నాయి. దీనికి తోడు నిస్సైనిక మండలంలో భారీ ఎత్తున మందుపాతరలు, విద్యుత్తు కంచె, నిఘా కెమేరాలు ఉన్నాయి. సెప్టెంబర్‌ 2020లో దక్షిణ కొరియా మత్స్యశాఖ అధికారులను ఉత్తర కొరియా సైనికులు హత్య చేసి దహానం చేశారు. ఈ ఘటనతో అప్పట్లో ఇరు పక్షాల మధ్య ఉద్రిక్తతలు పెరిగిపోయాయి. 

కొన్నాళ్ల క్రితం దక్షిణ కొరియా నుంచి వచ్చిన ఓ ఉత్తరకొరియా వాసిలో కొవిడ్‌ లక్షణాలు కనిపించాయి. దీంతో ఉత్తర కొరియా అధినేత కిమ్‌ జోంగ్‌ ఉన్‌ దేశవ్యాప్తంగా అత్యవసర పరిస్థితి విధించారు. కిమ్‌ నిబంధనలు కఠిన తరం చేయడంతో ఉ.కొరియా నుంచి ద.కొరియాకు పారిపోయేవారి సంఖ్య కూడా గణనీయంగా తగ్గింది.