NEET: నీట్‌ మినహాయింపు బిల్లుకు తమిళనాడు ఆమోదం

చెన్నై: ఎంబీబీఎస్‌, బీడీఎస్‌ కోర్సుల్లో ప్రవేశాల కోసం జాతీయ స్థాయిలో నిర్వహించే అర్హత పరీక్ష నీట్ పరిధి నుంచి తమిళనాడును శాశ్వతంగా మినహాయించే బిల్లును ఆ రాష్ట్ర అసెంబ్లీ ఆమోదించింది. ఇకపై 12వ తరగతి మార్కుల ఆధారంగా విద్యార్థులకు వైద్య విద్య కోర్సుల్లో అవకాశాలు కల్పించనున్నట్లు రాష్ట్ర ప్రభుత్వం బిల్లులో పేర్కొంది. సీఎం ఎంకే స్టాలిన్‌ ఈ బిల్లును ప్రతిపాదించగా.. భాజపా మినహా అన్ని విపక్ష పార్టీలూ ఇందుకు ఆమోదం తెలిపాయి. భాజపా సభ్యులు ఈ బిల్లును వ్యతిరేకిస్తూ సభ నుంచి వాకౌట్‌ చేశారు.

నీట్‌ పరీక్ష భయంతో  పరీక్ష రాయడానికి కొన్ని గంటల ముందు ధనుష్‌ (20) అనే విద్యార్థి ఆత్మహత్య చేసుకున్నాడు. రెండుసార్లు నీట్​ రాసిన ఆ విద్యార్థి.. ఈసారి కూడా ఉత్తీర్ణత సాధించకలేకపోతానేమో అన్న భయంతో ఆత్మహత్యకు పాల్పడినట్లు కుటుంబ సభ్యులు తెలిపారు. ఈ ఘటనపై అసెంబ్లీలో చర్చ జరిగింది. ప్రతిపక్ష అన్నాడీఎంకే సభ్యులు నల్ల చొక్కాలు ధరించి సభకు హాజరయ్యారు. నీట్‌ విషయంలో డీఎంకే ప్రభుత్వాన్ని వారు తప్పుబట్టగా.. ఆ విమర్శలను స్టాలిన్‌ తిప్పికొట్టారు. జయలలిత అధికారంలో ఉన్నప్పుడు కూడా నీట్‌ పరీక్ష నిర్వహించలేదని గుర్తుచేశారు. పళనిస్వామి సీఎం అయ్యాకే 2017లో తొలిసారి రాష్ట్రంలో నీట్‌ నిర్వహించారన్నారు. నీట్‌ మినహాయింపు బిల్లును కూడా గత అన్నాడీఎంకే ప్రభుత్వం తిరస్కరించిందని గుర్తు చేశారు.