Donald Trump: డొనాల్డ్‌ ట్రంప్‌.. బ్లాక్‌బెల్ట్‌

వాషింగ్టన్: అమెరికా మాజీ అధ్యక్షుడు డొనాల్డ్ ట్రంప్​(75)కు అరుదైన గౌరవం దక్కింది. దక్షిణ కొరియా దిగ్గజ మార్షల్ ఆర్ట్స్​ సంస్థ కక్కివొన్.. ట్రంప్‌ను 9వ ర్యాంక్ డాన్ బ్లాక్​బెల్ట్‌తో సత్కరించింది. ఈ సంస్థ అధ్యక్షుడు లీ డాంగ్ సియోప్.. అమెరికా ఫ్లోరిడాలోని ట్రంప్ నివాసానికి వెళ్లి అవార్డును స్వయంగా అందజేశారు. ధ్రువపత్రాన్ని కూడా అందించారు. ట్రంప్‌న​కు తైక్వాండో పట్ల ఆసక్తి ఉన్నట్లు తన దృష్టికి వచ్చిందని డాంగ్‌ సియోప్‌ ఈ సందర్భంగా పేర్కొన్నారు.

బ్లాక్​ బెల్టు అందుకున్న అనంతరం ట్రంప్ ఆనందం వ్యక్తం చేశారు. వెంటనే బెల్టు ధరించి ఫొటోలకు పోజులిచ్చారు. ఈ గౌరవం తనకు దక్కినందుకు సంతోషంగా ఉందని పేర్కొన్నారు. ఆత్మరక్షణకు తైక్వాండో గొప్ప మార్షల్​ ఆర్ట్​ అని ట్రంప్‌ ప్రశంసించారు. భవిష్యత్తులో మళ్లీ అమెరికా అధ్యక్షుడినైతే ఈ బ్లాక్‌బెల్టు ధరించి కాంగ్రెస్‌(శాసనసభ)కు హాజరవుతానని వ్యాఖ్యానించారు. ట్రంప్​ కంటే ముందు రష్యా అధ్యక్షుడు వ్లాదిమిర్​ పుతిన్​ను  బ్లాక్​బెల్టుతో సత్కరించింది దక్షిణ కొరియా. 2013లో ఆయన ఆ దేశ పర్యటనకు వెళ్లినప్పుడు తైక్వాండో గ్రాండ్​ మాస్టర్​గా కూడా ప్రకటించింది.

కాగా ట్రంప్ నివాసంలోని గోడపై పలు ఆసక్తికర ఫొటోలు దర్శనమిచ్చాయి. ఉత్తర కొరియా అధ్యక్షుడు కిమ్​ జాంగ్ఉన్​ను 2019లో పన్ముంజోమ్​లో కలిసిన ఫొటోతో పాటు బ్రిటన్ రాణిని కలిసిన చిత్రాలు ఉన్నాయి. మెలానియా ట్రంప్​తో ఆయన ప్రిన్స్ ఆఫ్​ వేల్స్​ను కలిసేందుకు వెళ్లిన ఫొటో కూడా ఆకర్షణీయంగా ఉంది.

► Read latest National - International News and Telugu News