Alia bhatt: అక్కడే ఉంటే ఏడ్చేసేవాళ్లం

‘ఆనందం ఎక్కువైతే ఒక్కోసారి నోట్లోంచి మాట రాదు. ఆ సంతోషం ఆనందభాష్పాల్లా వ్యక్తమవుతుంది’ అంటోంది అలియా భట్‌. కృతి సనన్‌తో కలిసి జాతీయ ఉత్తమ నటిగా అవార్డు అందుకున్న ఆనాటి భావోద్వేగాల్ని తాజాగా పంచుకుంది. ‘ఆ క్షణాలు నాకు, కృతికి ఒక మరుపురాని జ్ఞాపకం. అవార్డు కార్యక్రమంలో వేదిక ఎక్కే సమయంలో కృతి నా ముందు నిల్చుంది. ‘నిన్నొకసారి కౌగిలించుకోచ్చా?’ అని అడిగింది. నేను వెంటనే తనని హగ్‌ చేసుకున్నా. ఇద్దరం కాసేపు అలాగే ఉండిపోయి తీవ్ర భావోద్వేగానికి లోనయ్యాం. ఆ క్షణం ఇద్దరి కళ్లలో నీళ్లు. ఇంకాసేపు అలాగే ఉంటే.. అక్కడే ఏడ్చేసేవాళ్లమేమో! ఇద్దరమ్మాయిల కల నెరవేరిన రోజది’ అంటూ అవార్డు అందుకోవడానికి ముందు జరిగిన సంగతుల్ని గుర్తు చేసుకుంది అలియా. ‘గంగూభాయ్‌ కాఠియావాడీ’, ‘మిమీ’ చిత్రాల్లో నటనకు ఈ ఇద్దరూ సంయుక్తంగా ఉత్తమ నటీమణులుగా ఎంపికైన సంగతి తెలిసిందే.