alaya: అందర్నీ మెప్పించడం సాధ్యం కాదు

‘కెరీర్‌లో జయాపజయాలు సహజం. అవి ఎంతమాత్రం నాపై ప్రభావం చూపించవు. ప్రేక్షకులు మెచ్చేలా నటించుకుంటూ వెళ్లడమే నా పని’ అంటోంది అలయా ఎఫ్‌. ఇటీవలే తను నటించిన ‘బడేమియా ఛోటేమియా’ భారీ వసూళ్లు రాబట్టడం లేదన్న ప్రశ్నకు సమాధానమిస్తూ ఈ విధంగా బదులిచ్చింది అలయా. ‘సినిమా ఆడినా, ఆడకపోయినా నేను పెద్దగా పట్టించుకోను. ఎందుకంటే అప్పటికే ఆ చిత్రం నుంచి చాలా నేర్చుకొని ఉంటా. కొత్త ప్రేక్షకులను చేరుకొని ఉంటా’ అంటూ ప్రతి సినిమా నుంచి సానుకూలతలే తీసుకుంటానని పరోక్షంగా చెప్పుకొచ్చింది. రివ్యూలపై స్పందిస్తూ ‘సినిమా అసలైన రివ్యూ ప్రేక్షకుల నుంచి వస్తుంది. సినిమా చూసీ, చూడకుండా తమ అభిప్రాయం వెల్లడించే వాళ్ల గురించి ఏమీ చెప్పలేం’ అంది. ‘నా పాత్రలో గొప్పగా నటించాను అని కొందరు అంటే.. చెత్తగా చేశానని వేరొకరు అంటారు. అందర్నీ మెప్పించడం ఎవరికీ సాధ్యం కాదు. ఒప్పుకున్న ప్రతి పాత్రనీ మనసు పెట్టి చేయడమే నా పని’ అంటూ ముగించింది.