shabana: వేడుకలా షబానా 50 ఏళ్ల సినీ ప్రయాణం

ప్రముఖ బాలీవుడ్‌ సీనియర్‌ నటి షబానా అజ్మీ చలనచిత్ర పరిశ్రమలో విజయవంతంగా 50ఏళ్లను పూర్తి చేసుకున్నారు. ఈమె ఈ మైలురాయిని చేరుకున్న సందర్భంగా న్యూయార్క్‌ ఇండియన్‌ ఫిల్మ్‌ ఫెస్టివల్‌(ఎన్‌వైఐఫ్‌ఫ్‌) ఓ వేడుకను నిర్వహించనుంది. వచ్చే నెలలో ఈ కార్యక్రమాన్ని నిర్వహించనున్నట్లు ఎన్‌వైఐఫ్‌ఫ్‌ తాజాగా వెల్లడించింది. 1974లో ‘అంకుర్‌’ చిత్రంతో సినీరంగంలో అడుగుపెట్టిన షబానా. ఇన్నేళ్లు చిత్రపరిశ్రమకు అందించిన సేవలకు విశేష ఆదరణ లభించిందని సినీ వర్గాలు తెలిపాయి. భారతీయ అంతర్జాతీయ చలనచిత్ర పరిశ్రమలో షబానా ఈ ఏడాదితో ఐదు దశాబ్దాలు పూర్తి చేసుకున్న సందర్భంగా, దీపా మెహతా దర్శకత్వంలో ఈమె నటించిన ‘ఫైర్‌’ చిత్రాన్ని ప్రదర్శించనున్నారు. ఈ నేఫథ్యంలో షబానా మాట్లాడుతూ...‘‘ఎన్‌వైఐఫ్‌ఫ్‌’ ప్రారంభమైనప్పటి నుంచి దానితో నాకు మంచి అనుబంధం ఉంది. కొన్ని సంవత్సరాలుగా ఎన్‌వైఐఫ్‌ఫ్‌ సాధించిన పురోగతి చూస్తుంటే చాలా ఆనందంగా ఉంది. నా 50ఏళ్ల సినీ ప్రయాణాన్ని ఎన్‌వైఐఫ్‌ఫ్‌ ఓ వేడుకలా నిర్వహిస్తున్నందుకు సంతోషిస్తున్నాను’ అని అన్నారు. ఈ కార్యక్రమం మే 31 నుంచి జూన్‌ 2 వరకూ జరగనుంది.