Amitabh Bachchan: మనవడికి అమితాబ్‌ అభినందనలు

‘ది ఆర్చీస్‌’.. బాలీవుడ్‌ ప్రముఖ కథానాయకుల వారసులు ఈ సినిమాతో చిత్రపరిశ్రమలో అడుగుపెడుతున్నారు. షారుక్‌ ఖాన్‌ కుమార్తె సుహానా ఖాన్‌, దివంగత శ్రీదేవి రెండో కూతురు ఖుషీ కపూర్‌, అమితాబ్‌ బచ్చన్‌ మనవడు అగస్త్య నందా తదితరులు కీలక పాత్రలు పోషిస్తున్నారు. జోయా అక్తర్‌ ఈ చిత్రాన్ని తెరకెక్కిస్తున్నారు. ఇటీవలే ఈ సినిమా ట్రైలర్‌ విడుదలై ప్రేక్షకులను ఆకట్టుకుంది. ఈ సందర్భంగా అమితాబ్‌ బచ్చన్‌ తన మనవడు నందాకి శుభాకాంక్షలు తెలుపుతూ... యువ కథానాయకుడిగా కుటుంబ వారసత్వాన్ని ముందుకు తీసుకెళ్తావని కోరుకుంటున్నా అంటూ ఇన్‌స్టా వేదికగా పోస్ట్‌ పెట్టారు. అగస్త్య నందాని చూసి గర్వపడుతున్నానంటూ అభిషేక్‌ బచ్చన్‌ తెలిపారు. ‘ఇది చాలా బాగుంది. ఈ సినిమా చూసేందుకు చాలా ఆతృతగా ఉన్నాను. అగస్త్య.. నిన్ను చూస్తుంటే చాలా గర్వంగా ఉంది. చిన్నప్పుడు నా బెడ్‌పై నుంచి దూకుతూ గీటార్‌ వాయించే స్థాయి నుంచి అదే గీటార్‌ పట్టుకుని ఇప్పుడు తెరపై కనిపిస్తున్నావు. ఈ స్థాయికి ఎదిగిన నీ ప్రయాణం అద్భుతంగా సాగాలని కోరుకుంటున్నాను. ఇప్పుడే చిత్రపరిశ్రమలోకి అడుగుపెడుతున్న యువకథానాయకులందరికీ ఆల్‌ ది బెస్ట్‌’ అంటూ వ్యాఖ్యల్ని జోడించారు. ఈ సినిమా డిసెంబరు 7న ఓటీటీ వేదికగా విడుదల కానుంది.