Anand Deverakonda: రన్‌.. ఫన్‌.. గన్‌

‘బేబి’తో హిట్టు కొట్టి జోరు మీదున్నారు ఆనంద్‌ దేవరకొండ. ఇప్పుడు ‘గం.. గం.. గణేశా’ అంటూ సందడి చేసేందుకు సిద్ధమయ్యారు. ఆయన హీరోగా నటించిన ఈ చిత్రాన్ని ఉదయ్‌ శెట్టి తెరకెక్కించారు. కేదార్‌ సెలగంశెట్టి, వంశీ కారుమంచి సంయుక్తంగా నిర్మించారు. ఈ చిత్ర ఫస్ట్‌లుక్‌ను నటి సమంత సామాజిక మాధ్యమాల వేదికగా శనివారం విడుదల చేశారు. ఆ ప్రచార చిత్రంలో ఆనంద్‌ రెండు రైఫిల్స్‌ పట్టుకొని ఆసక్తికరంగా కనిపించారు. బ్యాగ్రౌండ్‌లో గన్స్‌ పట్టుకున్న గ్యాంగ్స్‌, బాంబు పేలుళ్ల దృశ్యాలు కనిపించాయి. ‘రాజువారి పల్లి.. రన్‌-ఫన్‌-గన్‌’ అంటూ ఆ పోస్టర్‌పై కనిపించిన ఓ వ్యాఖ్య ఆసక్తిరేకెత్తించింది. యాక్షన్‌ ఎంటర్‌టైనర్‌గా తెరకెక్కిన ఈ సినిమా ప్రస్తుతం నిర్మాణానంతర పనుల్లో ఉంది. త్వరలో విడుదల తేదీ ప్రకటించనున్నారు. ఈ చిత్రానికి చేతన్‌ భరద్వాజ్‌ సంగీతమందిస్తున్నారు. ఆదిత్య జవ్వాడి ఛాయాగ్రాహకుడిగా వ్యవహరించారు.