Ashish Vidyarthi: ప్రపంచాన్ని చూడాలనుకుంటున్నా.. అందుకే రెండో వివాహం చేసుకున్నా: ఆశిష్‌ విద్యార్థి

హైదరాబాద్: ఆశిష్‌ విద్యార్థి.. ఒక్కసారిగా ఈ నటుడి పేరు ఇంటర్నెట్‌లో హాట్‌ టాపిక్‌గా మారింది. 57 ఏళ్ల వయసులో రుపాలీ బరూవా (Rupali Barua)ను రెండో వివాహం చేసుకున్నట్లు ప్రకటించారు. ఆ పెళ్లికి సంబంధించిన ఫొటోలను విడుదల చేయడంతో ఆయనపై నెట్టింట వార్తలు మొదలయ్యాయి. తాజాగా తన పెళ్లి గురించి వివరణ ఇస్తూ ఓ వీడియో పోస్ట్‌ చేశారు. మొదటి భార్యతో స్నేహపూర్వకంగానే విడిపోయినట్లు స్పష్టం చేశారు.

‘‘అందరి జీవితం ఒకేలా ఉండదు. అందరి ఆలోచనలు కూడా ఒకేలా ఉండవు. భిన్నమైన మనస్తత్వాలు కలిగిన మనుషులు ఉంటారు. అందరి నేపథ్యాలు కూడా వేరుగా ఉంటాయి. కానీ ప్రతి ఒక్కరూ కోరుకునేది మాత్రం సంతోషమే. నా మొదటి భార్య పీలూ విద్యార్థితో (Piloo Vidyarthi) నేను 22 ఏళ్లు కలిసున్నా. మా జీవితం ఎంతో అద్భుతంగా గడిచింది. మాకో కుమారుడు కూడా ఉన్నాడు. గత రెండు సంవత్సరాలుగా మా మధ్య మనస్పర్థలు తలెత్తాయి. కలిసి ఉండలేమని నిర్ణయించుకున్నాం. అందుకే స్నేహపూర్వకంగా విడిపోయాం’’ అని ఆశిష్‌ విద్యార్థి (Ashish Vidyarthi) తెలిపారు.

ఇక రుపాలీ బరూవా (Rupali Barua) గురించి మాట్లాడుతూ..‘‘నేను, రూపాలీ రెండు సంవత్సరాల ముందు స్నేహితులమయ్యాం. మేము చాటింగ్‌ చేసుకున్నాం. ఒకరి గురించి ఒకరం పూర్తిగా తెలుసుకున్నాం. మేము భార్యాభర్తలుగా జీవించగలమనే నమ్మకం కలిగింది. అందుకే వివాహం చేసుకున్నాం. ఆమె వయసు 50 ఏళ్లు. నాకు 57 సంవత్సరాలు. మేము వయసు గురించి ఎప్పుడూ ఆలోచించలేదు. అయినా సంతోషంగా జీవించడానికి వయసుతో సంబంధం లేదు. నాకు ఇష్టమైన వారితో కలిసి ప్రపంచాన్ని చూడాలనుకుంటున్నా.. అందుకే తనను వివాహం చేసుకున్నా’’ అని అన్నారు.