Captain Miller: యుద్ధభూమిలో కెప్టెన్‌ మిల్లర్‌

‘కెప్టెన్‌ మిల్లర్‌’ (Captain Miller)గా సందడి చేసేందుకు సిద్ధమవుతున్నారు కథానాయకుడు ధనుష్‌ (Dhanush). ఆయన టైటిల్‌ పాత్రలో నటిస్తున్న ఈ చిత్రాన్ని అరుణ్‌ మాథేశ్వరన్‌ తెరకెక్కిస్తున్నారు. సెంథిల్‌ త్యాగరాజన్‌, అర్జున్‌ త్యాగరాజన్‌ సంయుక్తంగా నిర్మిస్తున్నారు. ఈ చిత్ర ఫస్ట్‌లుక్‌ను శుక్రవారం విడుదల చేశారు. అందులో ధనుష్‌ మొదటి ప్రపంచ యుద్ధంలో ఉపయోగించిన లూయిస్‌ మెషిన్‌ గన్‌ను చేతిలో పట్టుకొని యుద్ధభూమిలో నిల్చొని కనిపించారు. బ్యాగ్రౌండ్‌లో వేలాది మంది సైనికులు విగత జీవులై పడి ఉన్నారు. 1930-40ల మధ్య కాలంలో జరిగిన ఆసక్తికర కథాంశంతో యాక్షన్‌ డ్రామాగా ఈ సినిమాని తెరకెక్కిస్తున్నారు. ధనుష్‌ కెరీర్‌లోనే అత్యధిక బడ్జెట్‌తో నిర్మితమవుతున్న చిత్రమిది. సందీప్‌ కిషన్‌, శివ రాజ్‌కుమార్‌, ప్రియాంక మోహన్‌ తదితరులు కీలక పాత్రలు పోషిస్తున్నారు. ఈ సినిమా తెలుగు, తమిళం, హిందీ భాషల్లో ఏక కాలంలో విడుదల కానుంది. ఈ చిత్రానికి సంగీతం: జీవీ ప్రకాష్‌ కుమార్‌, ఛాయాగ్రహణం: శ్రేయాస్‌ కృష్ణ.