Jailer: ‘జైలర్‌’లో బాలకృష్ణను అనుకున్నా కానీ: దర్శకుడు నెల్సన్‌

ఇంటర్నెట్‌ డెస్క్‌: రజనీకాంత్‌ హీరోగా నటించిన ‘జైలర్’ (Jailer) చిత్రం హిట్‌టాక్‌తో దూసుకెళ్తోంది. ఆయన (Rajinikanth) యాక్షన్‌, స్టైల్‌కు ప్రేక్షకలోకం ఫిదా అవుతోంది. సినిమా విజయం సాధించిన సందర్భంగా దర్శకుడు నెల్సన్‌ దిలీప్‌కుమార్‌ (Nelson Dilipkumar) ఓ ఇంటర్వ్యూలో పాల్గొని, ఆసక్తికర విశేషాలు పంచుకున్నారు. ఈ సినిమాలోని ఓ పాత్ర కోసం టాలీవుడ్‌ అగ్ర నటుడు నందమూరి బాలకృష్ణ (Nandamuri Balakrishna)ను తీసుకోవాలని అనుకున్నానని, కానీ అది సాధ్యపడలేదని తెలిపారు. ‘‘తెరపై రజనీకాంత్‌ సర్‌ ఒక్కరు కనిపిస్తేనే జోష్‌ వస్తుంది. అందుకే ఈ సినిమాని మల్టీస్టారర్‌గా తీయాలని అనుకోలేదు. ప్రత్యేక ఆకర్షణ కోసమే మోహన్‌లాల్‌, శివ రాజ్‌కుమార్‌లను ఎంపిక చేశా. వీరు నటించడం వల్ల ‘జైలర్‌’ మల్టీస్టారర్‌ అనే ఊహాగానాలు వచ్చాయి. ఇందులోని ఓ పోలీసు పాత్ర కోసం తెలుగు హీరో బాలకృష్ణను అనుకున్నా. కానీ, కథానుగుణంగా ఆ క్యారెక్టర్‌ను సరిగా డిజైన్‌ చేయలేకపోయా. అలాంటప్పుడు ఆయన్ను ఎంపిక చేయడం సరైంది కాదనిపించింది. అందుకే ఆయన్ను అసలు సంప్రదించలేదు. నటించేందుకు ఆయన అంగీకరించేవారో, లేదో తర్వాతి సంగతి. భవిష్యత్తులో ఆయనతో సినిమా చేస్తానేమో’’ అని నెల్సన్‌ అన్నారు. ఒకవేళ ఈ సినిమాలో బాలకృష్ణ కూడా భాగమై ఉండి ఉంటే మరో రేంజ్‌లో ఉండేదనే చర్చ ఇప్పటికే నెట్టింట మొదలైంది.

ఎదురుదెబ్బలు తిన్నా.. తలొగ్గని బీస్ట్‌.. నెల్సన్‌ దిలీప్‌ ప్రయాణమిదే!

యాక్షన్‌ నేపథ్యంలో రూపొందిన ఈ సినిమాలో రజనీకాంత్‌ రిటైర్డ్ పోలీస్ అధికారిగా నటించారు. జాకీష్రాఫ్‌, రమ్యకృష్ణ, తమన్నా, సునీల్‌, యోగిబాబు, వసంత్‌ రవి, మిర్నా మేనన్‌ కీలక పాత్రలు పోషించారు. తెరపై రజనీకాంత్‌ కనిపించి దాదాపు రెండేళ్లుకావడంతో ఆయన అభిమానులు ఈ సినిమాపైనే ఆశలు పెట్టుకున్నారు. ఆగస్టు 10న విడుదలైన ఈ చిత్రం వారి అంచనాలు అందుకుంది.

జైలర్‌ రివ్యూ కోసం ఇక్కడ క్లిక్‌ చేయండి..