Rashmika: ‘సికందర్‌’ సరసన రష్మిక

త్వరలో ‘పుష్ప 2’తో శ్రీవల్లిగా తెరపైకి రావడానికి ముస్తాబవుతోంది అందాల తార రష్మిక. కథల ఎంపికలో ప్రత్యేకతను చూపించే ఈ భామ.. ఇప్పుడు మరో కొత్త ప్రాజెక్టుకు పచ్చజెండా ఊపింది. బాలీవుడ్‌ అగ్రకథానాయకుడు సల్మాన్‌ ఖాన్‌ ‘సికందర్‌’ అనే సినిమాలో నటిస్తున్న సంగతి తెలిసిందే. తాజాగా ఈ సినిమాలో కథానాయికగా రష్మికను ఎంపిక చేసినట్లు ప్రకటించింది చిత్రబృందం. తమిళ దర్శకుడు ఏఆర్‌ మురుగదాస్‌ తెరకెక్కిస్తున్న చిత్రమిది. ఈ విషయాన్ని తెలుపుతూ ఇన్‌స్టా వేదికగా ఓ పోస్ట్‌ పెట్టింది రష్మిక. ‘‘ఎన్నో రోజుల నుంచి నా తదుపరి సినిమాల విశేషాల గురించి మీరు ఎంతో ఆసక్తిగా ఎదురుచూస్తున్నారని నాకు తెలుసు. మీ కోసమే ఈ సర్‌ప్రైజ్‌. ‘సికందర్‌’తో త్వరలో మీ ముందుకు రాబోతున్నాను. ఇంత గొప్ప ప్రాజెక్టులో నేను భాగమయినందుకు గర్వంగా ఉంది’’ అని చెప్పుకొచ్చింది. భావోద్వేగాలతో కూడిన ఈ యాక్షన్‌ చిత్రాన్ని సాజిద్‌ నడియాడ్‌వాలా నిర్మిస్తున్నారు. ఈ సినిమా చిత్రీకరణను ఇప్పటికే ప్రారంభించినట్లు సన్నిహిత వర్గాలు తెలిపాయి. ప్రస్తుతం ‘రెయిన్‌ బో’, ‘ది గర్ల్‌ఫ్రెండ్‌’, ‘కుబేర’ చిత్రాలతో బిజీగా ఉంది రష్మిక.