Dasara: నాని.. ధూమ్‌ ధామ్‌ దోస్తానా

విజయదశమి సందర్భంగా ‘దసరా’ (Dasara) నుంచి ఓ కానుక అందించనున్నారు నాని (Nani) . ఆయన కథానాయకుడిగా నటిస్తున్న ఈ చిత్రాన్ని శ్రీకాంత్‌ ఓదెల తెరకెక్కిస్తున్న సంగతి తెలిసిందే. సుధాకర్‌ చెరుకూరి నిర్మాత. కీర్తి సురేష్‌ కథానాయిక. ప్రస్తుతం శరవేగంగా చిత్రీకరణ జరుపుకుంటోంది. ఈ సినిమాలోని తొలి గీతాన్ని దసరా సందర్భంగా విడుదల చేయనున్నట్లు ప్రకటించారు నాని. ఈ మేరకు ఆయన సామాజిక మాధ్యమాల ద్వారా ఓ ప్రత్యేక వీడియోని పంచుకున్నారు. ‘ధూమ్‌ ధామ్‌ దోస్తానా’ అంటూ సాగే ఈ మాస్‌ పాటకు సంతోష్‌ నారాయణన్‌ స్వరాలు సమకూర్చగా.. ప్రేమ్‌ రక్షిత్‌ నృత్యరీతులు సమకూర్చారు. ఇంత వరకు రాని మాస్‌ స్ట్రీట్‌ పాటగా ఇది అందరినీ అలరిస్తుందని నాని తెలిపారు. తెలంగాణలోని ఓ పల్లెటూరి నేపథ్యంగా సాగే మాస్‌ యాక్షన్‌ ఎంటర్‌టైనర్‌ ఇది. తెలుగు, హిందీ, తమిళ, కన్నడ, మలయాళ భాషల్లో వచ్చే ఏడాది మార్చి 30న విడుదల కానుంది.