SR Kalyanamandapam: డబ్బు సంపాదిస్తేనే విలువ: సాయికుమార్‌

హైదరాబాద్‌: ‘పది రూపాయలు సంపాదిస్తే కానీ మన కడుపున పుట్టినవాడు కూడా మనకి విలువివ్వడు’ అని అంటున్నారు నటుడు సాయికుమార్‌. ఆయన కీలకపాత్రలో నటించిన చిత్రం ‘ఎస్‌ఆర్‌ కళ్యాణ మండపం’. కిరణ్‌ అబ్బవరం, ప్రియాంకా జువాల్కర్‌ జంటగా నటించిన ఈ సినిమా మరికొన్ని రోజుల్లో ప్రేక్షకుల ముందుకు రానుంది. ఈ నేపథ్యంలో బుధవారం ఉదయం ‘ఎస్‌ఆర్‌ కళ్యాణమండపం’ ట్రైలర్‌ను చిత్రబృందం సోషల్‌మీడియా వేదికగా సినీ ప్రియులతో పంచుకుంది.

ఇందులో సాయికుమార్‌-కిరణ్‌ తండ్రీకొడుకులుగా ఆకట్టుకున్నారు. ‘డబ్బుల్ది ఏముందిరా వస్తాయ్‌ పోతాయ్‌. మనం బతికే బతుకు కదా ముఖ్యం. నేను ఎంత పోగొట్టినా ఎవడి సొమ్ము తినలా’ అంటూ సాయికుమార్‌ చెప్పే బరువైన డైలాగులు ప్రతి ఒక్కర్నీ మెప్పించేలా ఉన్నాయి. కిరణ్‌, సాయికుమార్‌ నటన, హావభావాలు ఆకట్టుకునేలా ఉన్నాయి. శ్రీధర్‌ గాదే దర్శకత్వం వహించిన ఈ సినిమా ఆగస్టు 6న ప్రపంచవ్యాప్తంగా విడుదల కానుంది.