పీఎం కేర్స్‌కు చైనా నుంచి నిధులు అందాయా?

కాంగ్రెస్‌ నేత చిదంబరం సూటి ప్రశ్న

దిల్లీ: కరోనా కట్టడి కోసం ఉద్దేశించిన పీఎం కేర్స్‌ నిధులను జాతీయ విపత్తు నిర్వహణ నిధికి (ఎన్డీఆర్‌ఎఫ్‌) మళ్లించేలా ఆదేశించడం సాధ్యం కాదని సుప్రీంకోర్టు స్పష్టం చేసింది. ఆ రెండూ వేర్వేరు లక్ష్యాలు కలిగిన వేర్వేరు నిధులని ఈ సందర్భంగా న్యాయస్థానం అభిప్రాయపడింది. ఈ నేపథ్యంలో సీనియర్‌ కాంగ్రెస్‌ నేత చిదంబరం సుప్రీంకోర్టు తీర్పు అంతిమం అంటూనే.. పీఎం కేర్స్‌ నిధి సేకరణకు సంబంధించి పలు సందేహాలను లేవనెత్తారు. వాటిని ట్విటర్‌ మాధ్యమంలో తెలియజేశారు.
*పీఎంకేర్స్ నిధికి మార్చి 2020 మొదటి ఐదు రోజల్లో రూ.3076 కోట్ల విరాళం అందించిన దాతలెవరు?ఆ జాబితాలో చైనా సంస్థలు కూడా ఉన్నాయా?
*కొవిడ్‌-19 కార్యకలాపాలకు నిధి నుంచి డబ్బును కేటాయించే విధి విధానాలు ఏవి?
*లబ్దిదారుల నుంచి వినియోగ ధృవీకరణ పత్రాలను (యుటిలైజేషన్‌ సర్టిఫికెట్‌) తీసుకుంటున్నారా?
*ఈ నిధి సమాచార హక్కు పరిధి వెలుపల ఉన్నట్లయితే.. దీని గురించి ముఖ్యమైన సమాచారాన్ని ఎవరు వెల్లడిస్తారు?

పీఎం కేర్స్‌ సంబంధించి పారదర్శకత, వివరాల వెల్లడి, నిర్వహణ పద్ధతి తదితర అంశాలు న్యాయస్థానం సమక్షానికి రాలేదని చిదంబరం ఈ సందర్భంగా అభిప్రాయపడ్డారు. న్యాయస్థానం ఈ నిధి చట్టబద్ధతను గురించి మాత్రమే తీర్పునిచ్చిందని... దీని గురించి చర్చలు కొనసాగుతూనే ఉంటాయని మాజీ ఆర్థికమంత్రి చిదంబరం అభిప్రాయపడ్డారు.