జగన్‌ తిహాడ్‌ జైలుకు వెళ్లడం ఖాయం

వివేకా హత్య కేసులో అప్రూవర్‌ దస్తగిరి

ఈనాడు, కడప: వివేకాను జగన్‌మోహన్‌రెడ్డే హత్య చేయించారని, మాకంటే ముందు ఆయనే తిహాడ్‌ జైలుకు వెళ్లడం ఖాయమని ఈ కేసులో అప్రూవర్‌గా మారిన దస్తగిరి అభిప్రాయపడ్డారు. వివేకాను హత్య చేయడానికి ముందు జగన్‌తో ఫోన్‌లో మాట్లాడినట్లు చెప్పారు. ‘మనవాళ్లు చెప్పినట్లు చెయ్యు.. నేను చూసుకుంటాను’ అని జగన్‌ భరోసా ఇవ్వడంతోనే హత్య చేయడానికి అంగీకరించినట్లు వివరించారు. వివేకా హత్యకు కారణాలను గురువారం ఆయన ‘ఈనాడు-ఈటీవీ’కి వివరించారు. వివేకాను చంపినవారు దర్జాగా బయట తిరుగుతున్నారని జగన్‌ చెప్పడం సిగ్గుచేటని వ్యాఖ్యానించారు. తన చిన్నాన్నను చంపినోళ్లకు శిక్ష వేయించాల్సిన జగనే.. నిందితులను దగ్గర పెట్టుకుని కాపాడుతున్నారని విమర్శించారు. సామాన్యుడు సైతం సీఎంను ఎదురించగలడనే సంకేతం ఇచ్చేందుకే పులివెందుల నుంచి జై భీంరావు పార్టీ తరఫున పోటీ చేస్తున్నట్లు తెలిపారు. తాను ఎన్నికల ప్రచారం చేయకుండా వైకాపా నేతలు ఇబ్బంది పెడుతున్నారని ఆరోపించారు. పులివెందుల కోటలు బద్దలు కొట్టే రోజులు దగ్గర పడ్డాయని ధీమా వ్యక్తం చేశారు.