Telnagana News: ఎన్నికలు ఎప్పుడొచ్చినా.. 80 స్థానాల్లో గెలుపే లక్ష్యం: మాణికం ఠాగూర్‌

హైదరాబాద్‌: తెలంగాణలో కాంగ్రెస్‌ పార్టీ 70 నుంచి 80 స్థానాల్లో విజయం సాధించడమే లక్ష్యంగా పెట్టుకున్నట్లు ఆ పార్టీ రాష్ట్ర వ్యవహారాల ఇంఛార్జ్‌ మాణికం ఠాగూర్‌ తెలిపారు. కోమటిరెడ్డి వెంకటరెడ్డి నివాసంలో మాణికం ఠాగూర్, ఏఐసీసీ కార్యదర్శి బోస్ రాజు, కోమటిరెడ్డితో సమావేశమయ్యారు. తాజా రాజకీయ పరిణామాలపై విస్తృతంగా చర్చించారు. సమావేశం అనంతరం మాణికం ఠాగూర్‌ మాట్లాడుతూ.. ‘‘ఎన్నికలు ఎప్పుడైనా రావచ్చు. దీనిపై విస్తృతంగా చర్చించాం. సిరిసిల్లలో ఏర్పాటుచేసే రాహుల్ గాంధీ సభపైనా చర్చించాం. మిషన్ తెలంగాణ మొదలైంది. ఏకాభిప్రాయంతోనే టిక్కెట్ల కేటాయింపు ఉంటుంది. అందరితో కలిసి పని చేస్తాం. అన్ని కులాలను కలుపుకొని పోవాల్సి ఉంటుంది. ఒక్కరితో పార్టీ అధికారంలోకి రాదు. త్వరలో రాష్ట్రమంతా పర్యటిస్తాం. పార్టీలో చేరిన వాళ్లందరికీ టికెట్లు రావు’’ అని మాణికం ఠాగూర్‌ స్పష్టం చేశారు. 

ఆయన పార్టీకి నష్టం చేశారు: కోమటిరెడ్డి వెంకట్‌ రెడ్డి

‘‘నేనేమీ అసంతృప్తిగా లేను. పార్టీలో చురుగ్గానే ఉన్నా. దేన్నీ పట్టించుకోను. మొదటి నుంచి పార్టీలో ఉండి కష్టపడ్డ వారికే టికెట్లు ఇవ్వాలి. పార్టీ అధిష్ఠానాన్ని ఇదే కోరుతున్నా. పీఏసీకి రాలేనని నేను ముందే చెప్పాను. 29 మందితో కమిటీ వేస్తే.. దానికి వెళ్లి నేనేం మాట్లాడతాను. పీఎసీలో కమిటీ సభ్యుల సంఖ్యను కుదించాలి. డాక్టర్‌ రవి చేరిక చెల్లకపోతే బిల్యా నాయక్‌ చేరిక ఎలా చెల్లుతుంది? బిల్యా నాయక్‌ పార్టీకి వ్యతిరేకంగా పోటీ చేసి నష్టం చేశారు’’ అని కోమటిరెడ్డి ఆరోపించారు.