వారికి పూర్తి వేతనం చెల్లించండి:జీవన్‌రెడ్డి

హైదరాబాద్‌: కరోనా వ్యాప్తి నేపథ్యంలో విద్యుత్‌ శాఖను కూడా అత్యవసర సేవల కిందికి  తీసుకురావాలని కాంగ్రెస్‌ ఎమ్మెల్సీ జీవన్‌రెడ్డి ప్రభుత్వాన్ని కోరారు. ఈ మేరకు సీఎం కేసీఆర్‌కు లేఖ రాశారు. పోలీసు, వైద్యఆరోగ్యశాఖ, పారిశుద్ధ్య కార్మికుల మాదిరిగానే విద్యుత్‌శాఖ ఉద్యోగులను కూడా అత్యవసర సేవల సిబ్బందిగా గుర్తించాలని కోరారు. రాత్రీ పగలు తేడా లేకుండా నిరంతరం విద్యుత్‌ సరఫరా చేస్తున్న విద్యుత్‌ ఉద్యోగులు, సింగరేణి కార్మికులకు పూర్తి వేతనాలు ఇవ్వాలని జీవన్‌రెడ్డి విజ్ఞప్తి చేశారు.

సీఎంకు రాసిన లేఖ ప్రతులను సీఎస్‌ సోమేశ్‌కుమార్‌, ట్రాన్స్‌కో, జెన్‌కో సీఎండీ ప్రభాకర్‌రావు, సింగరేణి ఎండీ శ్రీధర్‌, ఆర్థిక, ఇంధన శాఖల కార్యదర్శులకు పంపారు. మార్చి నెల వేతనంలో కోత విధించిన ప్రభుత్వం.. భవిష్యత్తులోనూ దాన్ని కొనసాగించే అవకాశముందనే ఆందోళన ఉద్యోగుల్లో ఉందని పేర్కొన్నారు.