వారి కష్టాల్ని గుర్తించి ఆదుకోండి: పవన్‌

అమరావతి: కరోనాతో నెలకొన్న విపత్కర పరిస్థితుల్లో ప్రైవేటు ఉపాధ్యాయుల కష్టాలను ప్రభుత్వం గుర్తించాలని జనసేన అధినేత పవన్‌ కల్యాణ్‌ కోరారు. నాలుగు నెలలుగా జీతాలు లేక వారంతా అనేక ఇబ్బందులు పడుతున్నారన్నారు. జీతాల్లేక కొందరు పండ్లు, కూరగాయలు అమ్ముకొంటున్నారని  ఆవేదన వ్యక్తంచేశారు. ఎన్నో ఏళ్లుగా ఈ రంగంలో నిలదొక్కుకొని ఉన్న కార్పొరేట్‌ విద్యా సంస్థలు సైతం సిబ్బందికి వేతనాలు చెల్లించకపోవడం ఆశ్చర్యంగా ఉందన్నారు. బోధనా వృత్తి నుంచి హాకర్లు, కూలీలుగా మారిపోవడం బాధాకరమన్నారు. ప్రైవేటు పాఠశాలల సిబ్బందిని గుర్తించి ప్రభుత్వం ఆర్థిక సాయం చేయాలని పవన్‌ కోరారు.