Rajasthan: ప్రభుత్వాన్ని నిలబెట్టాం.. మాకేంటి?

కాంగ్రెస్‌ అధిష్ఠానాన్ని కోరిన రాజస్థాన్‌ బీఎస్పీ ఫిరాయింపు ఎమ్మెల్యేలు

జైపుర్‌: రాజస్థాన్‌ ముఖ్యమంత్రి అశోక్‌ గహ్లోత్‌ కేబినెట్‌ను విస్తరిస్తున్నారన్న సంకేతాలు రావడంతో.. ఆశావహులంతా అధిష్ఠానం దృష్టిలో పడేలా ప్రయత్నాలు ప్రారంభించారు. రాష్ట్రంలో బీఎస్పీ నుంచి కాంగ్రెస్‌లోకి ఫిరాయించిన ఆరుగురు ఎమ్మెల్యేలు కూడా ఈ జాబితాలో చేరారు. గత ఏడాది సచిన్‌ పైలట్‌ వర్గం తిరుగుబాటు చేసినప్పుడు, తమ చేరికల కారణంగానే రాష్ట్ర ప్రభుత్వం నిలబడిందని.. అందుకు తగిన ప్రతిఫలం, గౌరవం ఇప్పుడైనా దక్కాలని కోరారు. ఈ మేరకు మంగళవారం సంయుక్త ప్రకటన విడుదల చేశారు. సీఎం గహ్లోత్‌ నాయకత్వంపై తమకు సంపూర్ణ విశ్వాసం ఉందని అందులో పేర్కొన్నారు. ప్రస్తుతం పైలట్‌ వర్గంతో కాంగ్రెస్‌ అధిష్ఠానం చ ర్చలు జరుపుతుండటంపై వారు అభ్యంతరం వ్య క్తం చేశారు. నిరుడు ప్రభుత్వాన్ని సంక్షోభంలోకి నెట్టిన వాళ్ల డిమాండ్లు వినాల్సిన అవసరం లేదన్నారు. కేబినెట్‌లో ఖాళీ ఉన్న 9 మంత్రి పదవుల కోసం సుమారు 25 మంది ఎమ్మెల్యేలు ఆశలు పెట్టుకున్నారు. బీఎస్పీ నుంచి కాంగ్రెస్‌లోకి ఫిరాయించిన వారితో పాటు, సచిన్‌ వర్గంలోని ఎమ్మెల్యేలు, స్వతంత్రులు ఆశావహులు ఉన్నారు.

సీఎంపై విశ్వాసముందన్న పైలట్‌ వర్గం ఎమ్మెల్యే
మరోవైపు సచిన్‌ పైలట్‌ వర్గంలోని ఎమ్మెల్యేలలో ఒక్కొక్కరుగా అశోక్‌ గహ్లోత్‌ వైపు మొగ్గు చూపుతున్నారు. తాజాగా ఎమ్మెల్యే, మాజీ మంత్రి భన్వర్‌లాల్‌ శర్మ.. తమకు సీఎంపై విశ్వాసం ఉందని ప్రకటించారు. ‘‘సచిన్‌ పైలట్‌ను మా నాయకుడిగా పరిగణిస్తాం. కానీ ఆయన కంటే అశోక్‌ గహ్లాత్‌ పెద్ద నేత. పైగా ముఖ్యమంత్రి కూడా. అందుకే మాతో పాటు, సచిన్‌ కూడా గహ్లోత్‌ను నాయకుడిగా పరిగణించాల్సిందే.’’ అని విలేకరులతో చెప్పారు. ఇటీవలి కాలంలో సీఎంను కొనియాడిన పైలట్‌ వర్గం ఎమ్మెల్యేలలో భన్వర్‌లాల్‌ మూడో వ్యక్తి కావడం విశేషం.