సమస్యలు చెబుతుంటే పట్టించుకోరా?

ఎమ్మెల్యే వెలంపల్లిని నిలదీసిన మహిళ

విజయవాడ(చిట్టినగర్‌), న్యూస్‌టుడే: మా సమస్యలు చెబుతుంటే పట్టించుకోకుండా వెళతారేమిటని విజయవాడ పశ్చిమ నియోజకవర్గ ఎమ్మెల్యే వెలంపల్లి శ్రీనివాసరావును అన్నపూర్ణ అనే మహిళ నిలదీశారు. ఏ సమస్య గురించి అడిగినా చేయడానికి కుదరదని సమాధానం చెబితే ఎలా...? రక్షణ గోడ నిర్మించమంటే కాంట్రాక్టర్లు కొండపైకి రావడం లేదని చెబుతున్నారు...కుక్కల విషయం అడిగితే దాటవేస్తున్నారు...కాలువలు బాగు చేయరు...విద్యుత్తు స్తంభాలు వేయరు...చెత్త తీసుకుపోరు..కొండప్రాంతంలో నివసించే వారిని పట్టించుకోకపోతే ఎలా అంటూ ప్రశ్నించారు. తమకు పింఛన్లు ఆపేశారని...వీధి దీపాలు ఏర్పాటు చేయాలని...బోరు పంపుల మరమ్మతులు చేయాలని కొందరు ఎమ్మెల్యే దృష్టికి తీసుకు వచ్చారు. విజయవాడ ప్రైజర్‌పేట కొండప్రాంతంలో బుధవారం ‘గడప గడపకు మన ప్రభుత్వం’ కార్యక్రమం నిర్వహించారు. ఈ సందర్భంగా ఎమ్మెల్యే వెలంపల్లి శ్రీనివాసరావు స్పందిస్తూ తమ దృష్టికి వచ్చిన సమస్యలను పరిష్కరించే దిశగా చూస్తున్నామని తెలిపారు. కార్యక్రమంలో నగర మేయర్‌ భాగ్యలక్ష్మి తదితరులు పాల్గొన్నారు.