బజరంగ్‌ దళ్‌ను నిషేధించాలన్న డిమాండ్‌పై కేంద్ర మంత్రి గిరిరాజ్‌ ఆగ్రహం

ముస్లింలు పాక్‌కు వెళ్లాలని మండిపాటు

పట్నా: కర్ణాటకలో బజరంగ్‌దళ్‌ను నిషేధించాలని డిమాండ్‌ చేసిన ప్రముఖ ముస్లిం పండితుడు మౌలానా అర్షద్‌ మదానిపై కేంద్ర మంత్రి గిరిరాజ్‌ సింగ్‌ సోమవారం తీవ్రస్థాయిలో మండిపడ్డారు. దారుల్‌ ఉలూమ్‌ దేవ్‌బంద్‌ ప్రిన్సిపాల్‌ మదాని ఓ కార్యక్రమంలో ప్రసంగిస్తూ కర్ణాటక కాంగ్రెస్‌ ఎన్నికల మేనిఫెస్టోలో చేర్చిన బజరంగ్‌దళ్‌పై నిషేధం అంశాన్ని ప్రస్తావించారు. 70 ఏళ్ల క్రితమే ఇటువంటి చర్య తీసుకుని ఉండాల్సిందని అభిప్రాయపడ్డారు. ఈ వ్యాఖ్యలపై కేంద్ర మంత్రి గిరిరాజ్‌ సింగ్‌ తీవ్రంగా స్పందిస్తూ...‘దేశ విభజన సమయంలో ముస్లింలందరినీ పాకిస్థాన్‌కు పంపించి వేయాల్సింది’ అని సోమవారం పట్నాలో అన్నారు. టిప్పు సుల్తాన్‌కు జమ్మూకశ్మీర్‌ మాజీ ముఖ్యమంత్రి మెహబూబా ముఫ్తీ నివాళులర్పించడాన్నీ గిరిరాజ్‌ సింగ్‌ తప్పుపట్టారు.