Rajasthan: మీ గౌరవం చచ్చిపోయింది.. అందుకే గుండు చేయించుకొన్నా: సీఎంకు తల వెంట్రుకలు పంపిన ఎమ్మెల్యే

జైపుర్‌: రాజస్థాన్‌ ముఖ్యమంత్రి అశోక్‌ గహ్లోత్‌కు వ్యతిరేకంగా తరచూ ప్రకటనలు చేస్తూ వస్తున్న మాజీ మంత్రి, సాంగోద్‌ ఎమ్మెల్యే భరత్‌సింగ్‌ (కాంగ్రెస్‌) మరో వినూత్న పంథా ఎంచుకొన్నారు. ‘‘అశోక్‌ గహ్లోత్‌ గౌరవం, విశ్వాసం చనిపోయాయి.. అందుకే గుండు చేయించుకొని నా కేశాలు పంపుతున్నా’’ అంటూ ముఖ్యమంత్రికి ఆయన ఓ లేఖ రాస్తూ తల వెంట్రుకలను వాటికి జత చేశారు. ఈ లేఖ సామాజిక మాధ్యమాల్లో వైరల్‌గా మారింది. కోటా హెరిటేజ్‌ రివర్‌ఫ్రంట్‌ ప్రారంభోత్సవానికి మంగళవారం అశోక్‌ గహ్లోత్‌ హాజరుకావాల్సి ఉండగా.. చివరిదశలో సీఎం పర్యటన రద్దయింది. ‘‘రివర్‌ఫ్రంట్‌ ప్రారంభ సందర్భంగా నా అభినందనలు. అశోక్‌ గహ్లోత్‌ గాంధీ సిద్ధాంతాలు అనుసరిస్తారు. గనుల మంత్రి ప్రమోద్‌ జైన్‌ మరో దారిలో వెళతారు. సీఎం పదవి శాశ్వతం కాదు’’ అని భరత్‌సింగ్‌ లేఖలో పేర్కొన్నారు. కోటా జిల్లాలో జరుగుతున్న అవినీతిపై ఆయన విచారం వ్యక్తం చేశారు.