రాజేష్‌నాయుడి స్ఫూర్తిగా డబ్బులు తిరిగి రాబట్టుకోవాలి: రఘురామ

వైకాపా నాయకులకు ఎంపీ రఘురామకృష్ణరాజు సూచన

ఈనాడు, దిల్లీ: టికెట్ల కోసం డబ్బులు ధారపోసి మోసపోయిన వైకాపా నాయకులు రాజేష్‌నాయుడిని స్ఫూర్తిగా తీసుకొని మీడియా ముందుకొచ్చి వాస్తవాలు చెప్పాలని నరసాపురం ఎంపీ రఘురామకృష్ణరాజు సూచించారు. బుధవారం ఇక్కడ తన నివాసంలో విలేకర్లతో ఆయన మాట్లాడారు. ‘ఎన్నికల్లో టికెట్ల కోసం ఎంతోమంది నుంచి వైకాపా నాయకత్వం డబ్బులు వసూలు చేసింది. డబ్బులిచ్చిన వారు తిరిగి రాబట్టుకోవాలంటే రాజేష్‌నాయుడిని స్ఫూర్తిగా తీసుకోవాలి. మంత్రి విడదల రజినిని గుంటూరుకు బదిలీ చేశాక చిలకలూరిపేట నియోజకవర్గ ఇన్‌ఛార్జిగా రాజేష్‌నాయుడిని నియమించారు. టికెట్‌ కోసం తననుంచి రూ.ఆరున్నర కోట్లు వసూలు చేసినట్లు రాజేష్‌ మీడియా ముందు వాపోయారు. పెద్ద మనసు చేసుకొని సజ్జల రామకృష్ణారెడ్డి రూ.మూడు కోట్లు తిరిగి ఇచ్చారట. మిగిలిన రూ.మూడున్నర కోట్లు పెద్దాయన ఖాతాకు చేరి ఉంటాయి. టికెట్ల కోసం డబ్బులిచ్చి మోసపోయినవారు సగం డబ్బులనైనా రాబట్టుకోవాలంటే రాజేష్‌నాయుడు తరహాలో మీడియా ముందుకొచ్చి వాస్తవాలను చెప్పాలి’ అని ఆయన కోరారు. తనను నరసాపురం నుంచి తప్పించాలని జగన్‌మోహన్‌రెడ్డి ఎన్ని ప్రయత్నాలు చేసినా నెరవేరబోవని ధీమా వ్యక్తం చేశారు. తాను తప్పకుండా నరసాపురంనుంచే పోటీ చేస్తానని చెప్పారు.